Туршилт амжилттай болвол түгжрэл багасна гэв

Улаанбаатар хотын Замын цагдаагийн газраас дөрвөн уулзвараар жолооч нар гэрлэн дохио харгалзахгүй, баруун гар тийш чөлөөтэй эргэх журмыг боловсруулжээ. Энэ талаар холбогдох албаныхан мэдээлэл хийлээ.
Америк, Канад, БНСУ зэрэг оронд тогтмол асах нэмэгдэл ногоон гэрлээр баруун гар тийш эргэхийг зөвшөөрсөн дүрэмтэй байдаг аж. Иймд Улаанбаатар хотын Баруун болон Зүүн дөрвөн зам, Саппоро болон Гэсэр сүмийн уулзварт энэ хувилбарыг туршиж үзэхээр болжээ. Туршилтыг энэ сарын 10-нд эхлүүлэх юм байна. Ингэснээр замын түгжрэл 20 хувиар буурна гэж мэргэжилтнүүд үзэж байна.
Нийслэлийн Засаг даргын орлогч Ж.Батбаясгалан “Түгжрэлгүй гудамж, бухимдалгүй хот” төслийн хүрээнд авто замын хөдөлгөөнийг сайжруулах, түгжрэлийг бууруулах ажлын хэсэг гарган ажиллаж байгаа. Энэ ажлын нэг бол тогтмол асах нэмэгдэл ногоон гэрлээр баруун гар тийш эргэхийг зөвшөөрөх ажил юм” хэмээв.
Мөн замын цагдаагийн газрын дарга, Хурандаа Ч.Жаргалсайхан “Эхний ээлжинд дөрвөн уулзвар дээр туршина. Энэ уулзварууд нь нэмэлт тэмдэг, тэмдэглэл байршуулах, мэдээллийн самбар байрлуулах бололцоотой учраас сонгосон. Хэрэв туршилт амжилттай болвол цаашид энэ журмыг хэрэгжүүлж эхэлнэ” хэмээв.
Энэ өөрчлөлтийн давуу тал нь хөдөлгөөний ачаалал буурна гэдгийг албаныхан хэлж байна. Харин сул тал нь явган зорчигч осолд орох, уулзвараар зүүн гар тийш эргэх болон чигээрээ яваа тээврийн хэрэгсэлтэй мөргөлдөх осолтой аж. Иймд дээрхи дөрвөн уулзвараар зорчиж буй жолооч нар баруун гар тийш эргэхдээ эсрэг урсгалаас ногоон гэрлээр ирж буй автомашинд болон зам гарч яваа явган зорчигчид зам тавьж өгч соёлтой үйлчлүүлэхийг сануулж байна.
Нийслэлийн хэмжээнд гэрлэн дохионы зохицуулалттай 142 уулзвар байгаагаас 48 уулзвар нь баруун гар тийш тогтмол эргэх боломжтой аж.
- 1 талаас баруун эргэх боломжтой 12,
- 2 талаас баруун эргэх боломжтой 24,
- 3 талаас баруун эргэх боломжтой 8,
- 4 талаас баруун эргэх боломжтой 4 уулзвар байна.
Г.Тэгшсүрэн
СЭТГЭГДЭЛ БИЧИХ