УИХ-ын чуулганы нэгдсэн хуралдаанаар аж ахуй нэгжийн ОАТ-ын хөнгөлөлтийн хуулийг хэлэлцэх эсэхийг шийдэж байна. Гэхдээ гишүүд хэлэлцэх асуудлаар хальж, “Эрдэнэт”-ийн 49 хувийн хувьцааны асуудлыг асуултандаа хавчуулж, мэдээллийг нээлттэй өгөхийг Засгийн газраас шаардаж байлаа. Тухайлбал, УИХ-ын гишүүн С.Эрдэнэ ““Эрдэнэт”-д асуудал байгаа бол шалга. Манай,танай нам гээд ярих зүйлгүй. Өөрөө цэвэр гарч байвал бусад нь хамаагүй гэж яриад байдгаа болих хэрэгтэй. Засгийн газраас гарсан ажлын хэсэг дүгнэлтээ хаалттай  хуралдаанаар чуулган дээр мэдээлж болдоггүй юм уу. Би ч бас адилхан мэдээлэл авмаар байна. Эрдэнэтийн 49 хувь Монголын асуудал болсон гэж бодож байна” гэсэн бол гишүүн н.Батнасан, Д.Сарангэрэл  нар “Эрдэнэт”-ийн асуудлаар ямар шийдвэр гаргаж байгааг тодруулсан юм. Үүнд:

ЗГХЭГ-ын дарга Ж.Мөнхбат:

-Эрдэнэттэй холбоотой Засгийн газрын ажлын хэсэг хуралдаад, өнгөрсөн Засгийн гаргасан буруу шийдвэрийг засахаар болсон. Эрдэнэтийн 51 хувь хувийн хэвшилд шилжсэнийг засах шийдвэр гаргасан. Энэ асуудлаар хандах нь нээлттэй байгаа. Үүнд цэг тавих хэрэгтэй. 2016 оны зургадугаар сарын 16-ны өдрийн Засгийн газрын протокол нууц байсныг ил болгосон гэсэн бол

Хуульзүйн сайд С.Бямбацогт:        

-Тухайн үед Ерөнхий сайд Ч.Сайханбилэг Засгийн газрын хуралдааныг даргалж,  Аж үйлдвэрийн сайд Д.Эрдэнэбат  материалыг танилцуулж,  Сангийн сайд Б.Болор тушаал гаргаж, ГХ-ны сайд Л.Пүрэвсүрэн “Засгийн газар 49 хувийг худалдаж авахаас татгалзаж байна. Харин “Монголиан копр” корпориаци худалдан авахыг зөвшөөрч байна” гэсэн ОХУ-д илгээсэн юм билээ.  Засгийн газар тухайн үеийн энэ шийдвэрийг алдааг засч, 51 хувийг “Эрдэнэт” үйлдвэрт шилжүүлсэн. 49 хувийн хувьцаа эзэмшигч давуу эрхтэй байсан алдааг засч залруулж байна. Мөнгө шилжүүлсэн тухайд  арилжааны банкийг шалгах эрх Засгийн газарт байхгүй. Монголбанкны  шийдэх асуудал” хэмээн хариулав.