Боловсрол Соёл Шинжлэх Ухаан, Спортын сайд Ж.Батсуурь ерөнхий боловсролын сургуулийн сурагчдын амралтын хугацааг жил бүр өөрчилж ирснийг цуцалж, 2016-2017 оны хичээлийн жилээс тогтвортой мөрдөх шийдвэр  гаргажээ.

Энэхүү шийдвэрийн дагуу сум, тосгон, багийн ЕБС-ийн сурагчид билгийн тооллын хаврын тэргүүн сар буюу цагаан сарын баяраар шинийн 4-ний өдрөөс эхлэн долоо хоног амарч байхаар зохицуулжээ. Сар шинийн баяраар шинийн 1-3-нд олон нийтээр амардаг. Тэгвэл сайдын шийдвэрийн дагуу энэ жилээс хөдөө, орон нутгийн ЕБС-ийн сурагчид тухайн баяраар 10 хоног амарч байхаар боллоо. Мөн эл баяр хэзээ болохоос хамааран хичээлийн жилийн бүтцэд жил бүр өөрчлөлт оруулах шаардлагагүй болсон байна.

Мөн хөдөө, орон нутгийн ерөнхий боловсролын сургуулийн сурагчдын амралтыг мал төллөх хугацаатай уялдуулан шаардлагатай тохиолдолд сурагчдын гуравдугаар улирлын амралтыг нэг долоо хоногийн өмнө эхлүүлэх зөвшөөрлийг аймгийн Засаг даргад олгожээ. Түүнчлэн бага ангийн сурагчдын зуны амралтыг эрт эхлүүлж байхаар зохицуулсан байна. Тухайлбал I-II дугаар ангийн сурагчдын зуны амралт тавдугаар сарын 25-наас III-V ангийн сурагчид зургаадугаар сарын 1-нээс тус тус амарч эхлэх нь ээ.

Нийслэлийн бага ангийн сурагчид хүйтний ид үед гурван долоо хоног амарна. Харин хөдөө орон нутгийн бага ангийн сурагчид хоёр долоо хоног амрах юм байна.

Ингээд сурагчдын амралтын хуваарийг танилцуулж байна.

Энэхүү хуваарийг цаашид өөрчлөхгүй, урт хугацаанд дагаж мөрдөнө гэдгийг БСШУС-ын сайд онцоллоо.

Г.Тэгшсүрэн