Сэлэнгэ аймгийн Сайхан сумын Номгон багийн Хийдийн өвөр гэдэг газар “PRADO” загварын автомашинтай иргэн Д /37 настай, эрэгтэй/, О /38 настай, эмэгтэй/, Б /68 настай, эрэгтэй/, Б /65 настай, эмэгтэй/,  Т /19 настай, эмэгтэй/ нарын  5 хүн Дархан-Уул аймаг руу өчигдөр 19:00 цагт гараад сураггүй байна гэсэн дуудлага урьд шөнө 00:48 цагт аймгийн Онцгой байдлын газарт иржээ. Дуудлагын дагуу Онцгой байдлын газрын 5  албан хаагч, 1 техник хэрэгсэлтэйгээр өнөөдөр үргэлжлүүлэн ажиллаж байгаа юм байна.

Дархан-Уул аймгийн Орхон сумын 3-р баг Хамар даваан дээр дотроо 2 хүнтэй   “X-TRAIL” загварын автомашины кроп нь эвдэрсэн, тусламж үзүүлнэ үү гэсэн дуудлага энэ сарын 5-6-нд шилжих шөнийн 02:46 цагт  иржээ. Дуудлагын дагуу тус аймгийн Онцгой байдлын газрын 3 албан хаагч, 1 техник хэрэгсэлтэйгээр ажиллаж иргэн А /56 настай эмэгтэй/,  Г /52 настай эрэгтэй/  нарыг аварч, эвдэрсэн автомашиныг зөөвөрлөж Дархан хотын төвд авч ирсэн байна.

Мөн Завхан аймгийн  Тэс сумын Баян-Уул  багийн Шонтой мөргүү гэдэг газар  иргэн М-ийн “X-TRAIL” загварын  улсын дугаартай автомашин цасанд суусан гэсэн дуудлага энэ сарын 5-ны 20:01 цагт ирсэн байна. Тус аймгийн Онцгой байдлын газрын 4 албан хаагч, 1 техник хэрэгсэлтэйгээр ажиллаж 6 иргэнийг хөлдөж осгох эрсдлээс авран хамгаалжээ.

Иймээс иргэдийг холын замд явахдаа цаг агаарын байдлыг харж, сэрэмжтэй зорчихыг анхааруулж байна.

Н.Нягт