Монгол Улсын Ерөнхий сайд асан Н.Алтанхуяг мэдэгдэл хийж, 2017 оны Ерөнхийлөгчийн сонгуульд нэр дэвшинэ гэдгээ албан ёсоор мэдэгдэв. Тэрбээр ард түмний язгуур эрх ашгийг өмгөөлж, хуйвалдааны төрөөс хамгаалахын тулд энэ шийдвэрийг гаргасан гэдгээ хэлэв.

-Ерөнхийлөгчийн сонгуульд нэр дэвшинэ гэдэг таны хувь улстөрчийн шийдвэр үү?

-Энэ бол миний хувь улстөрчийн шийдвэр.

-Хуулийн дагуу бол намаас нэр дэвшинэ. Намд өрсөлдөөн байхгүй юу?

-Тэрийг тухайн цаг үед нь шийднэ. Би Ерөнхий сайд хийж байсан хүний хувьд Монголын нийгмийн өнөөдрийн байдлыг, манай Засгийн газраас хойших үйл ажиллагааг хараад зүгээр сууж, тэвчиж чадахгүй боллоо. Би Ерөнхийлөгчийн сонгуульд нэр дэвшинэ гэж бодоогүй байсан. Улс орны нөхцөл, дураараа авирлаж байгаа үйл ажиллагаа, хууль ёсыг гажуудуулдаг, бизнесийг дарамталдаг байдлыг хараад сууж чадахгүй.

-Өнөөгийн Засгийн газрын үйл ажиллагааг хэрхэн дүгнэж байгаа вэ?

-Байгуулагдаад нэлээн хэдэн сар болж байна. Олон нийт дүгнэнэ биз. Миний харж байгаагаар амласнаа хийдэггүй юм байна.

-Хуйвалдааны төрийн эсрэг тэмцэнэ гэлээ. Яаж тэмцэх вэ?

-УИХ-д байхдаа би үгээ хэлж, тэмцдэг байсан. Эд нар бохир аргаар манай Засгийн газрыг унагаасан.  Манай Засгийн газар унасан гол шалтгаан хоёр жил болсны дараа улам тод харагдаж байгаа. Би Монгол Улсын Ерөнхий сайдын хувьд Монголдоо, ард түмэндээ  ашиггүй олон үйлдлийг хийхгүй гэж эсэргүүцсэн. Тэглээ гэж манай Засгийн газрыг огцруулсан.

-АН-ын шинэчлэл ид яригдаж байна. Намын удирдлагын тухайд та ямар байр суурьтай байгаа вэ?

-АН шинэчлэгдэж, өөрчлөгдөх ёстой. Гэхдээ АН-ын, ардчиллын гол тулгуурыг хэн ингэж нурааж хаяв гэдгийг гаргаж, ойлголцох ёстой. Тэр чиглэлээр манай намынхан ажиллаж байх шиг байна. Дүрэм, дарга хоёрыг өөрчилсөнөөр намаа шинэчиллээ гэж ойлгож болохгүй. Энэ намыг өөрийн гэсэн толгой, үзэл бодолтой, хэн нэгний утсан хүүхэлдэй болдоггүй хүмүүс гарч ирж удирдана гэдэгт би эргэлзэхгүй байна.

-Хуйвалдагчид гэж нэг намыг хэлж байна уу?

-Хуйвалдагчид гэдэг нь нам дамнасан бүлэглэл. Нам гэдэг бол бүлэглэлүүдийн өрсөлдөж, дарга нь болдог газар байж болохгүй. Үүнийг хатуу санах хэрэгтэй. Ардчилсан нам руу санаархаж, шүлсээ үсэргэж байгаа хүмүүст хэлж байна. Өөрийн гэсэн толгой, үзэл баримтлалтай хүмүүс байх ёстой. Хэн нэгний утсан хүүхэлдэй АН-ын дарга байж болохгүй.

-Таны эхнэрт хилийн хориг тавьсан. Энэ асуудалд тайлбар өгөх үү?

-Манай эхнэр хүүхэд, эргэн тойрны хүмүүсийн тухайд үүссэн бодитой асуудал байхгүй. Та бүхэн олон жил харж байгаа. Монгол Улсын Ерөнхий сайдаас огцруулахын тулд эхэлсэн ажиллагааны үргэлжлэл явж байна. Одоо Монгол Улсын Ерөнхийлөгчид нэр дэвшиж магадгүй гэсэн том кампанит ажлуудын өчүүхэн хэсэг нь.

В.Бат