Ашигт малтмалын тээвэрлэлт нэмэгдэж Өмнөговь аймгийн Тавантолгой, Ухаа худгийн уурхайгаас Гашуунсухайт боомт чиглэлийн экспортын тээвэрлэлтийн нэмэгдэж боомтын чиглэлийн автозам дээрх ачаалал ихэссэнтэй холбогдуулан, эрэлтэд нийцсэн нийлүүлэлтийг хангах, тээврийн төлөвлөлтийг нарийвчлан гаргах зорилгоор “Эрдэнэс таван толгой” ХК, “Энержи ресурс” ХХК, “Гашуун сухайт авто зам” ХХК-тай хамтран ажиллахаар харилцан тохиролцож, Хамтын ажиллагааны санамж бичиг байгуулав.

Уг санамж бичгийн хүрээнд улс хоорондын тээвэрлэлт гүйцэтгэх гэрээгүй аж ахуй нэгж, байгууллагууд уурхайгаас ачилт хийх, авто замаар явах, мөн хил нэвтрэхгүй байх зохицуулалтыг хийсэн байна.

Цаашид улс хоорондын байнгын ачаа тээвэрлэлтийг зохицуулах, зохион байгуулах ажлын хүрээнд энэ  сараас эхлэн дээрх чиглэлүүдэд Автотээврийн үндэсний төвтэй улс хоорондын байнгын ачаа тээвэрлэлт гүйцэтгэх гэрээ байгуулсан аж ахуй нэгж, байгууллагуудын зөвхөн бүртгэлтэй тээврийн хэрэгслүүд хилээр ачаа тээвэрлэх боломжтой бөгөөд хил нэвтрэх зөвшөөрлийн бичгийг цахим хэлбэрээр бүртгэн олгож, хяналт тавих ажлыг эхлүүлэн ажиллахаар болжээ.

Улс хоорондын байнгын ачаа тээвэрт зонхилох ачаа нь уул уурхай, ашигт малтмалын тээвэрлэлт бөгөөд 

- Дорнод аймгийн Баянхошуу боомтоор газрын тос, тоног төхөөрөмж, 
- Сүхбаатар аймгийн Бичигтийн боомтоор газрын тос, нүүрс,
- Дорноговь аймгийн Замын-Үүд боомтоор өргөн хэрэглээний бараа бүтээгдэхүүн, барилгын материал, тоног төхөөрөмж,
- Ханги боомтоор нүүрс, төмрийн хүдэр, 
- Өмнөговь аймгийн Гашуунсухайт, Шивээхүрэнгийн боомтуудаар нүүрс, зэсийн баяжмал, 
- Говь-Алтай аймгийн Бургастай боомтоор төмрийн хүдэр, 
- Ховд аймгийн Булган сумын Ярантын боомтоор нүүрс тээвэрлэгдэж байна.