УИХ-ын чуулганы нэгдсэн хуралдаанаар Дотоодын цэргийн тухай хуулийн төслийн хэлэлцэж эсэхийг шийдэв. Хэлэлцэж байгаа асуудалтай холбогдуулан гишүүд байр сууриа хэллээ.

УИХ-ын гишүүн Ц.Нямдорж:

-1990 оныг хүртэл Аюулаас хамгаалах яамны хилийн болон дотоодын цэрэг гэж явсан. Болж байсан зүйлийг татан буулгачаад дахиад байгуулах гэж байгаа нь харамсал төрүүлээд байна. Би тусгай хүчин болгочихъё гэж бодож байсан юм. Дотоод аюулыг хамгаалах чиглэлтэй гол байгууллага болгохыг зорьж байлаа. Албан хаагчид нь цэргийн тусгай шалгуурыг давсан хүмүүс байхаар. Хууль батлагдсаны дараа энэ тал руу нь явуулсан нь дээр байх. Төр самардаг, хууль самардаг зүйл ийм эмгэнэлтэй байдал руу оруулаад байна. Ийм зүйл гарсанд харамсаад байна. Их самралт төлбөр өндөртэй байна даа.

УИХ-ын гишүүн Ж.Энхбаяр:

-Дотоодын цэргийн хуультай холбоотойгоор судалгааны ажлыг хийлгэсэн. Дотоодын цэргийн анги байгуулах нь зүйтэй гэдэг дээр мэргэжлийн эрдэмтэн судлаачид үгээ хэлсэн. Энэ нь Батлан хамгаалахын хуультай  нягт уялдах ёстой. Дотоодын цэргийн эрхзүйн тодорхойлолтоос эхлээд олон зүйлийг цэргийн албан хаагчийнхтай адилтган тогтоох ёстой. Энэ бүхэн хуулийн төсөлд бүдэг тусчээ. Иргэний ардчилсан нийгэмд байж болдоггүй, хуулиар хориглодог зүйлийг оруулж ирсэн байна. Нэг жилийн хугацаат цэргийн албан хаагчаар дотоодын цэргийг байгуулах нь боломжгүй. Хугацаат цэргийн албан хаагчаар терроризмтай тэмцэж болохгүй. Дотоодын цэргийн бие бүрэлдэхүүн мэргэшсэн байх ёстой. Дотоодын цэргийг байгуулах нь зүйтэйг дэмжиж байгаа ч салбарын боловсон хүчнийг чадавхижуулах хэрэгтэй.

Ийнхүү гишүүд үг хэлсний дараагаар Дотоодын цэргийг байгуулах нь зүйтэй гэсэн санал хураалт явууллаа. Гишүүдийн 91.8 хувийн саналаар дэмжигдэв.

Дараагаар нь Засаг захиргаа, нутаг дэвсгэрийн тухай хуулийн төслийг хэлэлцэж эхэллээ.

Н.Энх