УИХ-ын чуулганы нэгдсэн хуралдаанаар “Эрдэнэт”-ийн 49 хувийг худалдан авсан ажиллагааг шалгах ажлын хэсгийн дүгнэлтийг хэлэлцэж байна.  “Эрдэнэт” үйлдвэрийн 49 хувийг төрийн өмчид авах тухай УИХ-ын тогтоолын төслийг өнөөдөр Хуульзүйн байнгын хороогоор дэмжсэн юм.  Хэлэлцэж байгаа асуудалтай холбогдуулан О.Баасанхүү нарын гишүүн горимын санал хэллээ.  УИХ-ын гишүүн О.Баасанхүү:

-Энэ асуудлыг хэлэлцэж байгаатай холбогдуулан Ерөнхийлөгч Ц.Элбэгдорж “Хувийн хэвшил гэдэг чинь ард түмэн биш юм уу” гэж Эрдэнэтийн 49 хувийг төрд авахыг эсэргүүцсэн маягтай жиргэсэн байна. Сошиал эх сурвалж биш ч энэ хуралдаанд Ерөнхийлөгч оролцвол асуух зүйл байна. Мөн ОХУ-аас ирүүлсэн захидлыг нууцын зэрэглэлтэйгээр гишүүдэд тарааж өгч болохгүй юу? гэхэд УИХ-ын дарга М.Энхболд:

-Ерөнхийлөгч чуулганы хуралдаанд тааллаараа оролцоно. УИХ-ын гишүүд горимын санал гаргаж энэ асуудлыг хэлэлцэхэд байлцаач гэснийг УИХ-ын Тамгын газрынхан Ерөнхийлөгчийн Тамгын газарт  дуулгаарай. “Ростех” корпорацийн Ерөнхий захирлаас ирүүлсэн захидлыг гишүүдэд тараачих. Нууцын зэрэглэл байхгүй байх.

Ингээд гишүүд хэлэлцэж байгаа асуудалтай холбогдуулан асуулт асууж, хариулт авч байна.

Н.Энх