Оффшорын эсрэг жагсаал энэ сарын 31-нд Сүхбаатарын талбайд болсон. Уг жагсаалыг “Ард түмний онц түр зөвлөл”-ийн санаачилгаар зохион байгуулж, УИХ-ын гишүүн асан Э.Бат-Үүл тэргүүтэй оффшор бүсэд данстай гэх нэр бүхий улстөрчдийг ил гарахыг шаардсан. Үүнтэй холбогдуулан УИХ-ын гишүүн асан Э.Бат-Үүлийн хүү Б.Чулуудай мэдэгдэл хийлээ.

2016 оны УИХ-ын сонгуулийн үеэр “Монгол HD” телевизээс Б.Чулуудайг оффшор бүсэд данстай, дансанд нь 480 тэрбум төгрөг байршиж буй талаар мэдээлэл цацаж байсан. Үүнд иргэн Б.Чулуудай мэдээллийн эхэнд албан ёсны тайлбар хийлээ. Тэрбээр “480 тэрбум битгий хэл 480 төгрөг гадагш гаргасан зүйл надад байхгүй. Би оффшор компани байгуулсан нь үнэн. Харин оффшор данс нээгээгүй. Дансаар ямар нэгэн хууль бус гүйлгээ хийгээгүй гэдгийг албан ёсоор мэдэгдмээр байна. Үүнийг шалгаж өгөхийг хүсэж, хууль хяналтын байгууллагад хандсан. Шалгагдаж байгаа. Хэрэв шалгалтаар хууль зөрчсөн маань илэрвэл би хуулийн өмнө хариуцлага хүлээхэд бэлэн байна” хэмээв.

УИХ-ын гишүүн асан Э.Бат-Үүл, түүний хүү Б.Чулуудай нарийг оффшор бүсэд их хэмжээний мөнгө нуун дарагдуулсан, татвараас зайлсхийсэн гэж буруутгадаг. Иргэн Б.Чулуудай өөрийгөө шалгуулахыг хүсэж хууль хяналтын байгууллагад олон удаа хандсан гэдгээ хэллээ. Гэвч шүүхээс тодорхой шалтгаан хэлж буцаасан. Мөн цагдаад хандсан боловч шалтаг зааж хүлээж аваагүй гэв. Иймд оффшорт их хэмжээний мөнгө нуусан эсэх талаар үнэн зөвийг заавал шүүх хяналтын байгууллагаар тогтоолгож, эргэн мэдээлнэ гэдгээ хэлж байлаа.

Мөн өнгөрсөн онд Б.Чулуудайг “Стратежик майнинг” гэх оффшор компанийг байгуулсан гэх мэдээ цацагдаж байв. Үүнд түүний өмгөөлөгч Б.Болд “Иргэн Б.Чулуудай монголд хөрөнгө оруулалт хийхийн тулд 2011 оны зургадугаар сард оффшор компани байгуулсан нь үнэн. Шалтгаан нь гадаадын хөрөнгө оруулагчид бизнесийн бүтцийн хувьд оффшор компаниар дамжуулан хөрөнгө оруулалт хийхийг шаарддаг тул уг компанийг байгуулсан. Үүнийг хэвлэл мэдээллийн хэрэгслээр мушгин гуйвуулж, хууль зөрчсөн мэт ойлгогдохоор мэдээ цацаж оффшор бүсэд данс нээж мөнгө нуусан гээд байна. Үнэн хэрэгтээ оффшор компанитай байлаа гээд оффшор данстай, түүндээ их хэмжээний мөнгө нуусан үг биш. Энэ компанийн үйл ажиллагааг зогсоосон учраас данс байхгүй” гэх тайлбарыг хэлэв.

“Ард түмний онц түр зөвлөл”-өөс оффшор данстай хүмүүсийг ил гарахыг шаардаж байсан. Тэгвэл тус зөвлөлийн гишүүдэд хандан Б.Чулуудай оффшор бүсэд данс нээгээгүй гэдгээ мэдэгдлээ.

Г.Тэгшсүрэн