УИХ-ын чуулганы хуралдаанаар  БСШУС-ын сайд Ж.Батсуурийг огцруулах асуудлыг хэлэлцэн, гишүүдийн 64.3 хувийн саналаар түүнийг Засгийн газрын гишүүнээс чөлөөллөө.  Үүнтэй холбогдуулан  ЗГХЭГ-ын дарга Ж.Мөнхбатаас зарим зүйлийг тодруулсан юм.

-БСШУС-ын сайдыг огцрууллаа. Энэ яамны холбогдох хүмүүст хариуцлага тооцох уу?

-Салбарын сайд бол тухайн салбарын ажил, үйл ажиллагааны хэрэгжилтийг  Ерөнхий сайд болон улсын хэмжээнд  дангаараа бүрэн хариуцах үүрэгтэй. Салбарын яамаа удирдаж чаддаггүй, яамныхан нь хэдэн тийшээ хараад суучихсан асуудал хэд хэдэн удаа гарсан. Сайд болон Төрийн нарийн бичгийн дарга, газрын дарга нарыг нь байлцуулж байгаад Ерөнхий сайд  үүрэг даалгавар өгч байлаа. Саяхан улсын шалгалтын тест задарч, дахин шалгалт өгөх үзэгдэл Монгол Улсад анх удаа гарлаа. Тийм учраас Ерөнхий сайд бүрэн эрхийнхээ хүрээнд БСШУС-ын сайдад хариуцлага тооцож байна. Дараагийн шат шатны хүмүүст хариуцлага тооцно.

Ерөнхий сайд өнөөдөр ОХУ-д ажиллахаар мордсон. Дараагийн сайдыг богино хугацаанд оруулж ирнэ гэж Ерөнхий сайд хэлсэн. Өнөөдрийн тухайд Ерөнхий сайдад нэрлэсэн хүн байхгүй.

-Сайдыг түр орлон гүйцэтгэгчээр хэн томилогдох бол?

-БСШУС-ын сайдыг ЗГХЭГ-ын дарга түр орлон гүйцэтгэгдэг. Тийм учраас өнөөдрөөс сайд томилогддог би түр орлон гүйцэтгэнэ.

-Төрийн нарийн бичгийн дарга нь салбарын сайдаа огцрууллаа гэж байна. Энэ талаар?

-Төрийн нарийн бичгийн дарга сайдыгаа огцруулах хүн биш байх. Ер нь энэ салбарын удирдлагууд хэдэн тийшээ хараад суусан. Тэр байтугай Төрийн нарийн бичгийн даргатайгаа хамтарч ажиллаж чадахгүй гэж газрын дарга нар Ерөнхий сайдын нэр дээр  бичиг ирүүлж байсан.