УИХ-ын чуулганаар Шүүхийн шийдвэр гүйцэтгэх тухай хуулийн шинэчилсэн найруулгын төсөл болон холбогдох бусад хуулийн төслийн эцсийн хэлэлцүүлгийг хийлээ. Хэлэлцэж байгаа асуудалтай холбогдуулан гишүүд асуулт тавьж, хариулт авав. УИХ-ын гишүүн Ц.Даваасүрэн:

-Хуулийг батлагдсаны дараа хэрэгжээд ирэхээр учир дутагдалтай асуудал гарах юм бол нэн яаралтай өөрчлөх ёстой. Тэгэхгүй бол хүний эрхийн асуудал хөндөгдөнө. гэсэн бол гишүүн Ж.Энхбаяр  "Шүүхийн шийдвэр гүйцэтгэх байгууллага маань хууль сахиулах байгууллага уу, цэргийн байгууллага уу? Үнэхээр хууль сахиулах байгууллага бол байгуулсан шиг байгуулаад хөгжлийн чиг хандлагыг зөв гаргаж өгөх ёстой. Гэтэл өнөөдөр эрх зүйн шинэчлэл хийж чадсангүй. Хууль зүй, дотоод хэргийн яам ямар бодлогоор оруулж ирээд байгааг ойлгохгүй байна" гэсэн юм. Үүнд Хууль зүй, дотоод хэргийн сайд С.Бямбацогт:

-Цэргийн цол өгөхгүй гээд хууль сахиулах цол, цагдаагийн цол оруулаад ирэхээр шүүмжлэл дагуулаад байдаг. Тиймээс өнөөдөр байгаа боломж, нийгмийн сэтгэл зүйд тохируулаад оруулж ирсэн. Хийхээр хэцүү, хийгүй байхаар хэцүү нөхцөл байдал дунд бид ажиллаж байна.

Дараагаар нь зарчмын зөрүүтэй саналаар санал хураалт явуулав.  Шүүхийн шийдвэр гүйцэтгэх байгууллагын удирдлагад цэргийн дээд цол олгож болно гэсэн горимын саналыг гишүүд дэмжсэн юм.

Гишүүн Ж.Энхбаяр "Хуульзүйн яам яагаад хуулийг өөр өөрөөр тайлбарлаад байна вэ. Төрийн бодлогыг яагаад завхруулах гээд байна. Шүүхийн шийдвэр гүйцэтгэх байгууллага генералаар юу хийх юм бэ. Шүүхийн шийдвэр гүйцэтгэх байгууллага хуулийн байгууллага. Шүүхийн шийдвэр гүйцэтгэх газар дөрвөн генералтай байгаад яах юм.  Засгийн газар төрийн бодлогыг хэрэгжүүлэх үүрэгтэй. Шүүхийн шийдвэр гүйцэтгэх газар хуулийн байгууллага ч биш, цэргийн байгууллага ч биш" хэмээсэнд БХ-ын сайд Б.Бат-Эрдэнэ:

-Хуулиар цэргийн цол, тэмдэг, хувцас тодорхой болсон  гэдгийг Засгийн газрын хуралдаан дээр хэлсэн. Тийм учраа цагдаагийн дарга цэргийн дээд цолтой  болно гэдгийг хэлсэн. Хууль сахиулах байгууллагын албаны онцлогоос шалтаална гэгдийг маш тодорхой хэлсэн. Манайх бригадын генералаас эхлээд явж байгаа хэмээн тайлбарлав.

Ингээд  зарчмын зөрүүтэй санал хураалт дуусч,хуулийг бүхэлд нь батлах санал хураалт явуулав. Гишүүдийн 63.0 хувийн саналаар Шүүхийн шийдвэр гүйцэтгэх тухай хуулийн шинэчилсэн найруулгыг баталлаа. 

Н.Энх