Ерөнхийлөгчийн сонгуулийн үр дүнтэй холбогдуулан МАН-ын удирдлагууд хэвлэлийн хурал хийлээ. Хэвлэлийн хуралд МАН-ын дарга М.Энхболд нар оролцов.  МАН-аас нэр дэвшигч МАН-ын дарга, УИХ-ын дарга М.Энхболд:

-УИХ-ын гаргасан шийдвэрийн дагуу өчигдөр Ерөнхийлөгчийн сонгуулийн санал хураалт боллоо. Сонгуулийн санал хураалтын дүнг СЕХ олон түмэнд тайлангаа тавьсан. Үүнтэй холбогдуулан би МАН-аас нэр дэвшигчийн хувьд мэдээлэл хийх нь зүйтэй гэж үзлээ. Юуны өмнө намайг дэмжиж надад саналаа өгсөн, миний сонгуулийн штабт ажилласан намын гишүүд, идэвхтэн зүтгэлтнүүдээ баярлалаа.

Сонгуулийн эцсийн дүн гараагүй байгаа ч гэсэн ямар ч үед улс орны эдийн засаг, ард түмний амьдралын төлөө зүтгэсээр байх болно. Би сонгуулийн сурталчилгаа эхлээгүй байхад “Олон түмнээ, төрөө дээдэлсэн сонгууль явуулъя” гэж хоёр нэр дэвшигчдэдээ хандаж хэлж байсан. Гэвч харамсалтай нь гутаан доромжилсон, гадаадаас сая саяар нь мөнгө авсан сонгуулийн сурталчилгаа болсон.

МАН амлалтаасаа яагаад буцсан талаар тайлбарыг би өгсөн. МАН болон миний биеийг оролцуулж, 60 тэрбум төгрөгийн тухай бичлэг  гаргасныг эвлүүлэг гэдгийг би хэлж байлаа. Газрын наймаачин гэдэг нэр өгсөнд ч тайлбар хийсэн.

Сонгуульд иргэдийн оролцоо сайн байлаа. СЕХ дараагийн сонгуулийн санал хураалтыг зарлаж байна. Үүнтэй холбогдуулан би эдийн засгийн нөхцөл байдал, үндэсний баяр наадмаа ч бодсон долдугаар сарын 09-ний өдөр  сонгуулийн санал хураалтыг зохион байгуулахад олон түмэн идэвхтэй оролцож, сонгуулийг үр дүнтэй болоход нь анхаарал тавихыг хүсч байна хэмээлээ.

Тэрбээр мэдээлэл хийснийхээ дараа сэтгүүлчдийн сонирхсон асуултад хариулав.

-МАХН-аас сонгуулийн үр дүнг эсэргүүцсэн мэдээлэл хийсэн. Энэ талаар...?

-Сонгуульд нэр дэвшсэн, сонгуульд оролцсон үйл ажиллагааны дараа МАН руу дайран үйлдлийг  бусад хүчний зүгээс гаргадаг. Бид улс төрийн соёлтой улс  төрийн хүчин. СЕХ-г шалгая, тоолъё гэдэг санал гаргаж байгааг нь зүйтэй гэж бодож байна.  Хэрвээ эргэлзээ байгаа бол  саналын хуудсыг хамтраад шалгасан ч болж байна.

Бид Сонгуулийн хуулийг 2015 оны 12 дугаар сард хэлэлцэж байхад саналын хуудсыг 100 хувь гараар тоолъё гэж хэлж байсан. Гэтэл тухайн үеийн эрх баригчид 50 хувьд нь гараар саналын хуудсыг тоолъё гэсэн. 

МАН-ын Ерөнхий нарийн бичгийн дарга Д.Амарбаясгалан:

-Манай намын нэр дэвшигчийг 10 аймагт илт давуу дэмжсэн дүнтэй байсан.  Газар нутгийн байршлаас шалтгаалан  зарим хэсгийн хороодын дүн мэдээ оройтож ирснийг СЕХ тайлбарласан. 

Н.Энх