Хөрөнгө орлогын мэдүүлэгтээ мэдүүлсэн бүх хөрөнгөтэйгээ дүйх үнэтэй гоёлоор өөрсдийгөө чимсэн тэрбумтнуудын хөрөнгийн эх үүсвэр хаанаас вэ гэдэг хэний ч сонирхох сэдэв.

Тэгвэл улс төрчдийн мөнгөө босгодог олон компаниудын нэг бол Эрдэнэс Тавантолгой гэж саяхны Өдрийн сонины дугаарт бичсэн байна. Тодруулбал, нүүрсний экспортын квотоос эрх бүхий улс төрчид бэл бэнчингээ бүрдүүлдэг гэсэн үг. Үнэхээр ч хувийн хэвшлийн Энэржи Ресурс компани нэг тонн нүүрсийг 150 доллараар борлуулж байхад Эрдэнэс Тавантолгойгоос Хятадад гаргаж буй нүүрс 60-70 доллар байна. 2 дахин хямд ...

Мөнхийн сэдэв болсон энэ асуудалд олон төрлийн үнэ хэлж, толгой эргүүлсэн тайлбар өгсөөр сэдэв нь өөрөө улиг болжээ. Харин саяхнаас сошлд энэ үнийн зөрүүг Засгийн газрын эрх мэдэл бүхий нэгэн эрхэм халаасалсан тухай мэдээлэл мэр сэр харагдах болов. Юу гэвэл, ЗГХЭГ-ын дарга Ж.Мөнхбат Хятадад айлчлахдаа Монголоос экспортлох нүүрсийг хямд байлгах тохироо хийж, үнийн зөрүү болох 20 сая долларыг өөрөө халаасалсан гэнэ. Энэ нь ч түүний 100 мянган долларын үнэтэй 3 бугуйн цагны учрыг тайлж байна. Хэзээний зайтай эр юм болохоороо оффшорт мөнгөө хадгалж гэнэдэхийн оронд өөртөө дэлхийн брэндээр хөрөнгө оруулалт хийсэн байх.

Хардах эрх хэнд ч бий. Тавантолгойн нүүрсний борлуулалтаас олон хүн цавчаа хийдэг тухай хар нийгэмд аль хэдийнэ бий болчихсон. Тэгэхээр олон улсад нүүрсний үнэ ямар байгаа юм, бид хэдээр гаргаж байгаа юм, цаана нь ямар компани хэдий хэмжээний квоттой байгаа юм, гэдгийг нэгтгэн аудит оруулаад, нийгэмд байгаа харыг нэг тийш болгочихоор санагддаг. Аудит орж, АТГ шалгавал нүүрс зарсан мөнгөний яг хэд нь бодитой өгөөж болж төсөвт орсон, хэн хичнээнийг нь цавчаа болгож авсан нь төвөггүй гараад ирнэ. Энэ харыг тайлж, хүн итгэхээр тайлбар өгөх шаардлага хууль, шүүхийн байгууллагынханд тулгарч байна. Харин үүнээс өмнө эрхэм сайд Ж.Мөнхбат та "иргэний зориг" гаргаад өөрөө тайлбар хийхгүй биз?

Э.Бат