Зуны дэлгэр цаг хэдий ч  их хот хоолой хорсгосон гашуун утаатай өглөөг угтаж байна.  Тодруулбал, түймрийн утаа хотыг бүрхэж байна.  Энэ зун хэт халалттай, наадмын өдрүүдэд бороо хургүй, +36 хүртэл хэм халсан. Тиймээс улсын хэмжээнд  хуурайшилт ихтэй байгаа.

ОБЕГ-ын  албаныхны мэдээлснээр өнөөдрийн байдлаар улсын хэмжээнд 21 түймэр асч байна.  Үүнээс  түймрийн 16 голомтод ОБЕГ-ын болон орон нутгийн нийт 700 гаруй албан хаагч, 30 машин техник ажиллаж байгаа юм.  Сэлэнгэ аймгийн Ерөө, Мандал, Хүдэр, мөн Булган аймгийн Сэлэнгэ, Хутаг-Өндөр сумаас гадна Төв аймгийн Батсүмбэр суманд хамгийн олон буюу таван түймэр асч байна.  Нийт түймрийн 70-80 хувь нь хүний хүчин зүйлээс, аялал зугаалгаар яваа иргэдийн болгоомжгүй үйлдлээс болж гарчээ.

Энэ  үед амралт,  зугаалгад гэр бүл, найз нөхдөөрөө байгалийн сайханд гарч, аялж байгаа иргэдийн санамсар, болгоомжгүй, хэнэггүй  зангаас үйлдсэн тамхины цог, түлсэн галын унтраагаагүй үлдээс эн цурам ийнхүү түймэр дэгдээлээ.

Тиймээс эхний ээлжинд Ерөнхий сайд захирам гаргаж, ногоон бүсэд аялал зугаалга хийхийг түр хугацаагаар хориглоод байна.

Түймэр гарсантай холбогдуулан олон нийт сайн дураараа нэгдэж, хандив цуглуулж, түймэр унтраах ажилд гар бие оролцохоо мэдэгдэн, холбогдох байгууллагад хандсан. Харин ОБЕГ-ын зүгээс иргэдийнхээ амь насыг болзошгүй аюулаас урьдчилан сэргийлэх зорилгоор түймрийн голомтод очихыг хориглож, онцгой байдлын албан хаагчдад туслахыг зөвшөөрсөн юм.

Эдүгээ түймэр гарч байгаа газарт сайн дурын 150 гаруй хүн очиж, онцгой байдлын албан хаагчдад хандивын хоол хүнс, хувцас хүргэж, тэдэнд тусалж байна.

Мэргэжлийн байгууллагынхан түймрийг унтрааж чадна гэдгээ мэдэгдэж, УЦУГ-ынхан түймэр асч байгаа бүс нутгуудад энэ сарын 17-19-нд борооны үүл хуримтлагдах ба зориудаар хур тунадас оруулах бололцоотой гэдгээ мэдэгдэн, иргэдийг тайван хүлээцтэй байхыг анхааруулж байна.

Сайн дураараа хандив өргөж байгаа олон нийтэд хандсан ОБЕГ-аас хүлээн авагч Онцгой байдлын ерөнхий газар,  нэмэлт санхүүжилт нэрээр ТӨРИЙН САНГИЙН 100900031405 ТООТ дансандхандивыг хүлээн авахаар боллоо.

Ийнхүү түймрийг унтраах ажилд мэргэжлийн байгууллагаас гадна, олон нийт санаа тавьж, хүч нэмэн ажиллаж байна. Ер нь хуурайшилттай жилүүдэд  түймэр дэгдэж, онцгойгийнхныг өндөржүүлсэн бэлэн байдалд ажиллуулсаар ирсэн. Харин цахим сүлжээ дэлгэрснээс хойш иргэд мэдээллийг шуурхай авч, сайн дурын хөдөлгөөн өрнүүлэх нь ихэссэн билээ.  Түймэр унтраахад оролцохоор сэтгэл гаргаж байгаа иргэдийг буруутгах аргагүй. Гэхдээ нөгөө талдаа наанадаж байгаль орчинд цаашлаад хүний амь насанд ч хүрч болох  эрсдэлтэй  түймэр хүний болгоомжгүй үйлдлээс гарсан. Тиймээс аялал, зугаалгаар явж байгаа хүмүүс байгальд элдэв хог хаяж, гал тавихгүй байвал энэ нь иргэний үүргээ биелүүлж, өөрт болоод бусдадаа хохирол учруулахгүй бие зөв авч яваа үйлдэл.  Онцгой байдлын хурандаа Ууганбаяр “Иргэд амь насаа хамгаалаад явж байгаа нь онцгой байдлын албан хаагдчдад үзүүлж байгаа том дэмжлэг” гэж хэвлэлд өгсөн ярилцлагадаа хэлсэн байна лээ. Хэн нэгний хэнэггүй, хайнга үйлдлээс гарсан хээрийн түймэр байгалийг ч,  улсыг ч хохироож байна. 

Байгальдаа биеэ болоод үйлдлээ зөв авч явцгаая, иргэд ээ. 

Н.Энх