Шадар сайд У.Хүрэлсүхийг дагаж мөрдөж байсан залуусыг хууль, хяналтынхан илрүүлэн шалгаж байгаа нь үнэн гэдгийг ажлын албанаас нь мэдэгдсэн билээ. Улмаар уг ажиллагаанд оролцож байсан залуусын төлөөллийн яриа бүхий бичлэг сошиал орчинд цацагдахдаа дагаж мөрдөх чиглэлийг ерөнхий сайд Ж.Эрдэнэбат өгсөн хэмээн ярьсан нь олон нийтийн анхаарлыг татаад байгаа юм. Ерөнхий сайд Ж.Эрдэнэбат энэ асуудалтай холбогдуулан ЦЕГ-т шалгуулахаар хүсэлтээ гаргасан. 

Тэгвэл Шадар сайд У.Хүрэлсүхийг дагаж мөрдсөн гэрчүүдийн ярьсанчлан, тэдэнд шууд байдлаар З.Золбаяр, н.Энхмэнд нарын гэх залуус чиглэл өгч байжээ. Баттай эх сурвалжийн мэдээлж буйгаар, З.Золбаярын аав Д.Зоригт нь Төрийн тусгай хамгаалалтын газарт ажиллаж байсан бөгөөд МАН-ын дарга, УИХ-ын дарга М.Энхболдыг Ерөнхий сайдаар ажиллаж байх үед нь түүний хамгаалалтын тасгийн даргаар нь ажиллаж байсан нэгэн аж. Тухайн үедээ М.Энхболд өөрийн хамгаалалтын тасгийн дарга Д.Зоригт болон хамгаалалтын ажилтан н.Мөнхбат нарт хотын захиргаанаас тэр үеийн Үйлдвэр худалдааны дээд сургуулийн хажууд баригдсан барилгад байр өгүүлж байжээ. Мөн Д.Зоригтын бага хүү З.Зол-Эрдэнэ нь одоо ТЕГ-т ажилладаг юм байна. Харин гэрчүүдэд У.Хүрэлсүхийг дагаж мөрдөх ажиллагааг Ерөнхий сайд Ж.Эрдэнэбатын захиалгаар зохион байгуулсан хэмээх тайлбарыг хэлсэн гэх н.Энхмэндийн төрсөн дүү н.Энхмөнх нь ТЕГ-т ажилладаг ажээ.