УИХ-ын гишүүн Т.Аюурсайхан парламентад оффшорын эсрэг лобби бүлэг байгуулж, оффшорын хуулийн хэрэгжилтэд хяналт тавихаар болсон. Харин түүнийг энэ чиглэлийн ажлаа хийх боломжийг Засгийн газар олгохгүй байгааг мэдэгдлээ.

Өнгөрсөн дөрөвдүгээр сарын 13-нд батлагдсан хуулинд оффшорын асуудлыг зохицуулахдаа ффшор бүсэд хамаарах улс орны жагсаалтыг олон улсын хүлээн зөвшөөрөгдсөн байгууллагын судалгаан дээр үндэслэж, Засгийн газар тогтоох ёстой. Монголбанкнаас уг жагсаалтын саналаа энэ оны 3 дугаар сард бэлэн болгосон аж. Харин Засгийн газар өнөөг хүртэл энэ чиглэлээр ажиллаагүй, хуулийг хэрэгжүүлээгүй байна.

Тиймээс Т.Аюурсайхан Ерөнхий сайд Ж.Эрдэнэбатыг оффшорчидтой хариуцлага тооцох эрх зүйн гаргалгааг санаатайгаар хаан боогдуулж байна гэж үзэж буйгаа мэдэгдлээ. Тэрбээр "УИХ-ын гишүүний хугацаа заасан албан тоотод хугацаандаа бүү хэл, бүтэн сар өнгөрч байхад нэг ч хариу байхгүй. Ингэж ажилла гэж Ерөнхий сайдаар чинь томилоогүй. Иргэд, аж ахуйн нэгжүүдээсээ хууль хэрэгжүүлэхийг шаарддаг, эс бол шийтгэдэг. Засгийн газар, түүний тэргүүн хууль хэрэгжүүлэхгүй бол адилхан шийтгэлээ хүлээх ёстой" хэмээн хариуцлага шаардлаа.

В.Бат