Ээлжит бус чуулганы хуралдаанаар Засгийн газрыг огцруулах асуудлыг хэлэлцэв. Хэлэлцэж байгаа асуудалтай холбогдуулан гишүүд үг хэллээ. Үүний дараагаар Ерөнхий сайд Ж.Эрдэнэбат үг хэлэв. Тэрбээр:

-Монгол Улс ардчилсан Үндсэн хуулиа мөрдөж эхэлсэнээс хойш 15 Засгийн газартай ажиллажээ. Үүнээс 11 нь хугацаанаасаа өмнө огцорч байсан байна. Гүйцэтгэх засаглалаа огцруулах нь улс орны хөгжлийг гацааж, эдийн засгаа чөдөрлөдөг. Бид улсаараа хөгжье гэвэл засаглалын тогтвортой байдлыг хадгалах хэрэгтэй.

Манай Засгийн газар өнгөрсөн нэг жилийн хугацаанд улсынхаа хөгжлийн төлөө ажиллалаа.  Ерөнхий сайд, Засгийн газрыг огцруулахад хуулийн үндэслэлтэй байх хэрэгтэй. Засгийн эрх авсны дараах эдийн засгийн хүндрэлтэй байдал, орон нутгийн болон Ерөнхийлөгчийн сонгууль Засгийг огцруулах асуудал үүсгэж байна.

Төр засгийн бодлого тогтвортой байвал баялаг бүтээгчид эдийн засгийн өсөлтийг нэмэгдүүлэх суурь тавигдсан.  Манай Засгийн газар 1.9 их наядын алдагдалтай төр, засгийг хүлээж авсан, өнөөдөр гурав дахин буураад байгаа. Одоо Чингис бондын өрийг төлөхөөр хувилбар боловсруулан ажиллаж байна. Аль ч улсын Засгийн газар хийх ажил их, хөрөнгө бага байдаг. 

Төрийн ажлыг ордонд, намын ажлыг намын байранд ярих ёстой.  Бидэнд одоо улстөржихгүй, талцахгүй байх хугацаа үлдсэн. Ямар ч том  төслүүдэд ашигтай, таатай цаг хугацаа гэж байдаг. Өнөөдөр эдийн засаг сэргэж эхэлсэн болохоос хямрал дуусаагүй байгаа. 

Сайд нартаа концесс хувааж өгсөн гэсэн 7 концессийн 5 нь өмнөх Засгийн газрын үед шийдвэр нь гарч, ажил нь эхэлсэн байсан. Концесс тус бүрийн үнийг бууруулж, 50 орчим тэрбум төгрөгийн хэмнэлт хийсэн. Ямар ч концессийн эзэмшигчийг солиогүй. Хууль зөрчсөн үйлдэл манай Засгийн газарт байхгүй. Бид өөрсдийгөө хамгаалж, албан тушаал булаацалдаагүй. 

Шадар сайдыг тагнасан гэх асуудал миний ой тойнд багтахгүй зүйл. Аргагүй эрхэнд хуулийн байгууллагад хандсан. Миний баримталдаг амьдралын философи албан тушаал, эрх мэдэл биш эр хүний нөхөрлөл. 

Би нэг ч хүнээс хөрөнгө мөнгө авч томилоогүй. Хуулийн дагуу томилгоо явуулсан. Богино зайны улс төрд цэг хатгах цаг болжээ. Ард түмэн 2016 оны сонгуулиар дахин давтагдах алдааг бус итгэл найдварыг сонгосон. Бид өнөөдрийн улс төрийн тогтворгүй байдал үүсгэх бус тогтвортой хөгжлийг ярих цаг хэлсэн. Засгийн газар тогтвортой ажиллах дархлаа нь УИХ өөрөө юм. 

Хэрвээ барьсан байшингаа улс төрийн эрх ашигтаа хөтлөгдөн нураах гэж байгаа бол би ард түмний эрх ашгийн талд явна. 

Төр нь түвшин байж, улс орон хөгжин цэцэглэж, ард түмний маань хийморь  золбоо өөдөө байг хэмээлээ. 

Н.Энх