МАН-ын Удирдах зөвлөл өнөөдөр хуралдлаа. Хуралдаанаар НИТХ-ын даргад  нэр дэвшигчийг хэлэлцсэн байна. НИТХ-ын даргаар НИТХ-ын төлөөлөгч Ж.Батбаясгалан, Д.Баярсайхан, Г.Төмөрбаатар нарын нэр явж байгаа.  Удирдах зөвлөлийн хурлаар дээрх нэр дэвшигчдийг нээлттэй үлдээж, нийслэлийн МАН-ын бүлгээр хэлэлцүүлэхээр болсон сурагтай.

НИТХ-ын даргад  төлөөлөгчдийн олонхийн санал авах магадлалтай эрхмээр нийслэлийн Жижиг дунд үйлдвэрлэлийг дэмжих төвийн дарга Д.Баярсайханыг зарим  сурвалж онцолж байна. Тэрбээр Сонгинохайрхан дүүргийн ИТХ-ын дарга, тус дүүргийн Засаг даргын орлогчоор  ажиллаж байсан, НИТХ-д хамгийн олон удаа сонгогдсон нэгэн. НИТХ-ын даргад нэр нь явж  байгаа нөгөө хоёр эрхмийн тухайд нийслэлийн Засаг даргын Ногоон хөгжил, агаарын бохирдол хариуцсан орлогчоор ажиллаж байгаа Ж.Батбаясгаланг УИХ-ын экс гишүүн Т.Бадамжунайн хүн гэдгээр нь андахгүй. Харин Сүхбаатар дүүргийн Засаг дарга асан Г.Төмөрбаатарыг МАН-ын Ерөнхий нарийн бичгийн дарга Д.Амарбаясгалангийн дэмжлэгтэй гэх бор шувуу нисч байна.

Нөгөөтэйгүүр маргааш болох НИТХ-ын үеэр дээрх асуудлыг хэлэлцэхэд заалнаас хэд хэдэн хүний нэрийг дэвшүүлэх магадлал ч байна. Тухайлбал,  НИТХ-ын төлөөлөгч С.Амарсайханы нэрийг дэвшүүлэх магадлалтай гэсэн таамаглал явж байгаа. Гэхдээ УИХ-ын гишүүн асан С.Отгонбаярын дүү С.Амарсайхан нь АН-аас МАН-д элссэн учир төлөөлөгчдийн дэмжлэг авахгүй болов уу гэж ажиглагчид харж байна.

Ямартай ч маргааш болох НИТХ шинэ даргаа тодруулна. Харин НИТХ-ын даргаар хэн сонгогдохоос нийслэлийн МАН-ыг тэргүүлэх эсэх  хамаарах биз ээ. 

Н.Нягт