Төрийн байгуулалтын байнгын хороо хуралдаж байна. Хуралдаанаар Ерөнхий сайдад нэр дэвшигч У.Хүрэлсүхийг томилох асуудлыг хэлэлцэж байгаа юм. Хэлэлцэж байгаа асуудалтай холбогдуулан гишүүд нэр дэвшигчээс асуулт асууж, хариулт авав.
УИХ-ын гишүүн О.Баасанхүү: -Ерөнхий сайдыг яаралтай томилох асуудлыг шаардлагатай. Нэр дэвшигч Ерөнхий сайд болвол Засгийн газрын бүтэц, бүрэлдэхүүнийг өөрчлөх үү?
Нэр дэвшигч У.Хүрэлсүх: -Төрийн алба эмх цэгцгүй үргэлжлэх ёсгүй. Засгийн газрын бүтцийг өөрчилж, яам, тамгын газрын ширээ сандлыг нааш цааш нь зөөж явах цаг байхгүй. Тиймээс би Ерөнхий сайдаар томилогдвол Ж.Эрдэнэбатын Засгийн газрын бүтцийг өөрчлөхгүй. Зөвхөн үнэнийг хэлж ажиллана.
УИХ-ын гишүүн Ж.Мөнхбат: -Та Ерөнхий сайд болвол давхар дээлний асуудлыг хэрхэх вэ? Ж.Эрдэнэбатын Засгийн газар хүүхэд бүрт алагчлалгүй мөнгө олгосныхоо төлөө огцорсон юм шүү. Багш нар цалингаа нэм гэж байна. Багш нарын цалинг 100 хувь биш гэхэд 50 хувь нэмэх боломжтой шүү. Засгийн газрын бүтцийг өөрчлөхгүй гэлээ. Төрийн албыг өөрчлөх үү?
Нэр дэвшигч У.Хүрэлсүх: -Төрийн албыг бужигнуулахгүй. Гэхдээ хариуцлага алдсан, ажил цалгардуулсан бол хариуцлага тооцно. Харин надаас хууль бус зүйл битгий нэхээрэй. Хүүхдийн мөнгийг 2017 онд бүх хүүхдэд олгоно. Харин 2018 онд бүх хүүхдэд олгож чадахгүй. Төсөв хүнд байгаа. Хэрвээ багш нарын цалинг нэмэх боломж, бололцоо байвал хамтарч ажиллая. Гарц ямар байгаа талаар саналаа хэлээрэй.
Төрийн байгуулалтын байнгын хорооны хуралдаан үргэлжилж байна.
Н.Энх