Чуулганы хуралдаан үргэлжилж байна. Хуралдаанаар Шадар сайдад Ө.Энхтүвшинг томилох асуудлыг хэлэлцэж байна.  Хэлэлцэж байгаа асуудалтай холбогдуулан гишүүд асуулт тавьж, үг хэлэв.

УИХ-ын гишүүн Т.Аюурсайхан:

-Шадар сайдад нэр дэвшиж байгаа Ө.Энхтүвшинг дэмжихгүй. Та албан тушаалын төлөө, Ж.Эрдэнэбатын Засгийн газар огцрох ёстой гэсэн. Гэтэл та Ерөнхий сайдад өрсөлдөөд намын хамт олноороо дүнгээ тавиулсан. Ерөнхий сайдыг томилох санал хураалт дээр та оролцоогүй. Шадар сайд болохгүй, нүх сүв рүү ороод байдаггүй гэсэн. Та бол муу муухайн үлгэр жишээ. Та намын даргаар ажиллаж байхдаа ажлаа хийж чадаагүй. Ганц удаагийн албан тушаал юу юм бэ. Өөрчлөлтийн эсрэг, улс төрийн наймаа тохироо, луйвар хийсэн хүн. Шударга ёсыг хүсч байвал шударга байх хэрэгтэй. Өөрөөсөө ичиж амьдар. Зөв зөнө.

УИХ-ын гишүүн М.Билэгт:

-Би Шадар сайдад Ө.Энхтүвшин дэвшүүлэхийг дэмжсэн хүн. Энэ хүний туршлага хэрэгтэй. Та мал ахуйн салбарт анхаарч ажиллаарай. Өвөлжилт хүнд болно. Мал, махыг борлуулахад малчдад дэмжлэг болоход анхаараарай.

УИХ-ын гишүүн Д.Гантулга:

-Хэнтий аймагт сүүлийн хэдэн сар шүлхийн өвчин тасарсангүй. Шадар сайдаар томилогдож байгаа Ө.Энхтүвшин даргад энэ талаар анхаарч ажиллахыг хүсье. Зүүн гурван аймагт малчдын ариутгалын бодисыг шийдэж өгөөрэй.

УИХ-ын гишүүн Б.Пүрэвдорж:

-Сайд нарыг томилох ажил нууц хуйвалдаанаар явлаа. Засаг байгуулах гэр барих адилхан. Та нар отрын гэр л барих гэж байгаа шүү дээ. Отрын гэр нэг баганатай байдаг. Гэтэл та нар отрын гэрээ хоёр баганатай болгочихсон. Засгийн газрыг байгуулах явц нохойн амаар явж байна. Ерөнхий сайд нь томилогдохдоо шударга ёсыг тогтооно, “60 тэрбум”-тай хариуцлага тооцно гэсэн. Гэтэл “60 тэрбум”-тайгаа нийллээ.

УИХ-ын гишүүн Ж.Батзандан:

-Энэ Засгийн газар “60 тэрбум”, Эрдэнэтийн 49 хувийг шийднэ, Зоригийн хэргийг нууцын зэрэглэлээс гаргана гэж байгуулагдсан гэж ойлгож байгаа. Шадар сайд Ө.Энхтүвшин тал бүрийн туршлагатай хүн. Энэ туршлагаа тогтвортой байдлын төлөө, үр дүнд хүрэхийн төлөө ажиллаасай билээ гэж хүсч байна. Эрх баригч нам урагшаа хараад явах ёстой. Гэр бүлд ч гэсэн маргаан байдаг, маргааш нь мартаад урагшилдаг. Энэ зөвхөн МАН-ын асуудал биш, Монголын асуудал. АН хэдий сөрөг хүчин ч Монголд тогтвортой байдал, тогтвортой засаг, эв нэгдэл хэрэгтэй. У.Хүрэлсүх та хоёрыг би зарчмаа тохирсон гэж бодож байгаа. Тэр зарчим чинь албан тушаалын төлөө биш, эв нэгдэл, шударга ёсны төлөө гэж ойлгож байна.

УИХ-ын гишүүн Л.Болд:

-Өнөөдрийг хүртэл Засгийн газарт хариуцлага тооцох шалтгааныг тоочсон. Одоо цаашдаа сайн ажиллана гэж зарлаад байгаа. Гэтэл тохиролцооны Засгийн газар бүрдэж байгаад харамсаж байна. 100 хувь давхар дээл өмсүүлж байгаа нь эвгүй харагдаж байна. Үргэлжлүүлээд дэд сайд, төрийн нарийн бичгийн дарга, тэгээд агентлагийн дарга нараа хуваана. 

Чуулганы хуралдаан үргэлжилж байна.

Н.Энх