Зуун жил дэх хамгийн өндөр үзүүлэлт
ОХУ-ын Эрчим хүчний сайдын орлогч Анатолий Яновский нь 2017 онд Оросын нүүрсний импорт өмнөх жилтэй харьцуулахад 8 хувиар өсөх ба 185 сая тоннд хүрнэ гэжээ. Тэрбээр ТАСС мэдээллийн агентлагт өгсөн ярилцлагандаа уг өсөлтийг гол төлөв Ази-Номхон далайн орнууд, тэр дундаа Энэтхэг, Өмнөд Солонгос болон Япон улсын тусламжтайгаар биелэнэ гэжээ. Хятад улс руу нийлүүлдэг нүүрсний хэмжээ тогтвортой хэвээр үлдэнэ.
“Бид Ази-Номхон далайн орнууд руу экспортлох нүүрсний хэмжээг жил болгон 4-5 сая тонноор өснө гэж таамаглаж байна. Учир нь бид өрсөлдөгчдөөсөө илүү чанартай нүүрс олборлодог” хэмээн Яновский хэлжээ. Нүүрсний чанарын сайжруулалт болон компанийн уян хатан үнийн бодлогоор экспортын хэмжээг нэмнэ.
Сайдын орлогчийн үгээр бол энэ жил Орос улс нүүрс олборлолтын хамгийн өндөр үзүүлэлт болох 400 сая тоннд (2016 оноос 4 хувиар илүү) хүрнэ гэжээ. Үүний хажуугаар баруун руу гаргадаг нийлүүлэлт нэг бол тогтвортой байна, нэг бол багасах юм.
Эдгээр мэдэгдэл нь Парисын Уур амьсгалын тухай гэрээний эргэн тойронд байгаа зөрчилдөөнд онцгой ач холбогдолтой юм. Уг гэрээний нэг асуудал нь Дэлхийн Банкнаас идэвхтэй дэмждэг нүүрсний эрчим хүчний үүсгүүрийг хязгаарлахад чиглэсэн үйл ажиллагаа юм. Одоогоор гол анхаарлаа Африкт хандуулж байгаа.
Экологи чухал ч америкчууд түрүүлээд байна
“Алор Брокер”-ын шинжээч Кирилл Яковенко дэлхийн ирээдүйд санаа зовнидоггүй улсууд дотроос Орос цаг уур болон байгаль орчинд ээлтэй ханддаг ч нүүрс ашиглах нь эдийн засгийн үүднээс байгалийн хий болон хийн нэгдсэн сүлжээгээр дамжих байгалийн хий ашиглахаас илүү ашигтай гэжээ. Үйлдвэрлэлд нь нүүрс томоохон байр суурь эзэлдэг орнууд томоохон компаниудынхаа орлого, ашгийг алдахаас эмээн түргэн хугацаанд экологид ээлтэй түлш рүү шилжиж чадахгүй. Тиймээс энд нүүрсний эрэлт өсөж байгаа юм. Энд гэдэг нь Оросын зүүн хөршүүд, Африк болон Ойр дорнодын талаар ярьж байгаа юм.
Нүүрсний салбарт өмнө нь нийлүүлэлт эрэлтээс давсан байсныг санах хэрэгтэй. 2011-2016 онуудад нүүрсний илүүдэл нийлүүлэлтийн үнэ буурч, хэд хэдэн томоохон тоглогчдын дампууралд хүргэн, нөхцөл байдлыг орвонгоор нь эргүүлсэн. Олон улсын спот худалдааны дүнгээр Оросын нүүрсний үнэ дорнодын хэрэглэгчдийн хувьд 1 тонн нь 52-91 доллар хүрсэн бол Барууны орнуудын хувьд 46 доллараас 80 доллар хүрсэн.
Кирилл Яковенкогийн хэлснээр мэдээж Оросын аж үйлдвэрлэлийн салбарынхан энэ өсөлтийг орхигдуулж чадахгүй болохоор өнгөрсөн жил ОХУ-ын нүүрсний экспорт олон жилийн турш анх удаа дотоодын нийлүүлэлтээс давсан байна. Эрчим хүчний яамны мэдээгээр экспортын хэмжээ 8.7 хувиар өсч 164.6 сая тонн хүрсэн ба дотоодын нийлүүлэлт 4.3 хувиар буурсан байна. Энэ үйл явдал нь ОХУ-ыг нүүрс олборлолтоороо Австрали, АНУ, Энэтхэг болон Хятадын дараа дэлхийд 5-д жагсахад хүргэсэн.
Африк бидний ард үлдлээ
Тус салбарын техник, тоног төхөөрөмжийн дахин хангамжийн асуудлын тал дээр NEO Centre-ийн зөвлөх бүлгийн "Үйлдвэр" -ийг хариуцсан Александр Ракша нь тэргүүлэгчидтэй өрсөлдөхүйц байхын тулд үнийг үнэн зөв хадгалахаас гадна чанарын шаардлага хангасан байх шаардлагатайг онцлон тэмдэглэв. Нүүрс экспортлогчдын томоохон нөөц бололцоо нь энэ салбарт хөрөнгө оруулалтыг байнга нэмэгдүүлдэг. Жишээлбэл, өнгөрсөн жил шинэчлэлд 73 тэрбум рубль чиглэгдэж байсан бол энэ онд 90 тэрбум рубль болсон байна.
Дэлхийн нүүрсний эрэлт хэрэгцээтэй холбоотойгоор Оросын Засгийн газар маш эерэг байгаа гэж шинжээчид үзэж байна. Нөөцийн хэмжээ дор хаяж 500 жил хүрэлцээтэй байх ёстой бөгөөд эрчим хүчний салбарт таамаглаж буйгаар нүүрсийг ахиад хэдэн арван жилийн туршид дэлхийн гол гурван эрчим хүчний эх үүсвэрийн нэгээр хэвээр үлдэх болно гэж шинжээчид үзэж байна.
Ази тивийн гол хэрэглэгчдээс гадна Украинд нүүрсний нийлүүлэлт нэмэгдсээр байгаа юм. Гаалийн Ерөнхий газрын мэдээгээр 2016 онд 9.9 сая тонн хүрч 2015 онтой харьцуулахад 10.2 хувь өссөн боловч Украин улс ОХУ-ын нүүрсний экспортын нийт хэмжээний 7 хувь ч хүрэхгүй байна.
ОХУ нь нэн тэргүүнд Ази, Африк, Энэтхэг, Малайз зэрэг оронд нүүрсээ нийлүүлэх зорилтыг хадгалж байна. Бид Африкийн орнууд болох Египет, Нигери, Кени, Замби, Конго, Гвиней, Танзани зэрэг улсуудыг чухалчлан харж байна. Энэ улсуудын "цэвэр" эрчим хүчний эх үүсвэрийг ашиглах боломж хоцрогдсон явдал нь нүүрсээ нийлүүлэх нэг шалтгаан болж байна. ОХУ-ын компаниудын үнийн бодлого, харьцангуй хүрэлцээт логистикийн боломжуудыг харгалзан үзвэл, Орос улс дэлхийн нүүрсний үйлдвэрлэгчдийн байр сууриа хэвээр хадгалж, эхний тавд багтсаар байх юм.
Эх сурвалж: EXPERT.RU