Сангийн сайд Ч.Хүрэлбаатар АМГТГ-ыг яамныхаа харьяанд авах санал оруулсан тухай яриа гарч байна.  Мөн ЕТГ-ын дарга З.Энхболд "Сангийн сайд Чимидийн Хүрэлбаатарын төрсөн ах нар болох Чимидийн Гантулга, Чимидийн Гансүх, мөн зөвлөх К.Дэмбэрэл нар Увс аймгийн Бөхмөрөн сумын Хотгор шанагын уурхайг Солонгосын компанид 2 сая доллараар заржээ. Монгол Улсын Үндсэн хуулийн 6.1-д заасан ард түмний мэдэлд байх нийтийн өмчийг лиценз нэрээр авсан Сангийн сайдын хамаатнууд зарж л байг уу? Төрийн өмчийн нэг муу амбаарыг хүртэл дуудлагын худалдаагаар зарж мөнгийг нь улсын төсөвт оруулдаг биз дээ. Ийм хүмүүсийг ядаж битгий сайд болооч гэж Ерөнхийлөгч хориг тавьсан. Энэ 7 хоногт УИХ-аар хэлэлцэнэ. МАН-ын бүлгийн 65-аас хэд нь өөрсдийн бүтээгээгүй ард түмний өмч байгалийн баялгийг үнэгүй хувьчилж авсан 30-н гэр бүлийн талд кнопдохийг харах л үлдлээ." хэмээн өөрийн цахим хуудасдаа жиргэсэн байлаа. 

Үүний холбоотойгоор Сангийн сайд Ч.Хүрэлбаатар дээрх асуудалтай холбоотой лавлагааг АМГТГ-аас авч  өөрийн цахимдаа хариу тайлбар хийсэн байна. Тэрбээр "Би болон манай ах нар ямар нэг Уул уурхайн лиценз өмнө нь болон одоо эзэмшиж, зарж байгаагүйг батлах баримт. Сайт руу орж шалгана уу?!!! Монголд их муухай 30 гэр бүл байгаа түүнийг АМГТГ-ын сайт руу ороод шалгах замаар тогтоодог гэж ЕТГ-ын дарга З.Энхболд байнгын хорооны  хурлын үер хэлсэн.  З.Энхболд та гүтгэлэг тараахаа болино уу" хэмээн жиргэжээ. Тэрбээр Сангийн яам АМГТГ-ыг харьяандаа авах гэж байгаа тухай яриаг ч үгүйсгэсэн юм. 

Н.Энх