Үндэсний аудитын газраас Ерөнхийлөгчийн сонгуульд нэр дэвшигчдэд иргэн, аж ахуйн нэгж байгууллагаас өгсөн хандивын мэдээллийг олон нийтэл ил болгожээ.

Ерөнхийлөгчийн сонгуульд оролцсон МАН, АН нийт 13 сая төгрөгийг зарцуулжээ. Үүний 6.7 сая төгрөг нь МАН, 6.6 сая төгрөг нь АН сонгуулийн ажилд зарцуулсан нь хуулийг баримталсан хэмээн үзжээ. Ерөнхийлөгчийн сонгуульд намаас гаргах зардлын дээд хэмжээг 6.8 сая төгрөгөөр тогтоосон юм.

Харин МАХН-ын тухайд сонгуулийн зардалд зориулж дансанд мөнгө төвлөрүүлээгүй байна. Зөвхөн нэр дэвшигчийн сонгуулийн зардлын дансыг ашигласан аж.

Ерөнхийлөгчийн сонгуульд нэр дэвшсэн М.Энхболд, Х.Баттулга, С.Ганбаатар нар сонгуулийн хугацаанд нийт 5 555 иргэнээс 8.6 сая төгрөг, 36 байгууллагаас 496 сая төгрөгийн хандив цуглуулжээ. Үүнээс М.Энхболд 1436 иргэнээс 2.5 сая төгрөг, 17 байгууллагаас 218 сая төгрөг цугласан байна. Харин Х.Баттулгад 1643 иргэнээс 3.2 сая төгрөг, 18 байгууллагаас 250 сая төгрөгийн хандив иржээ. С.Ганбаатарт 2476 иргэнээс 2.8 сая төгрөг, 2 байгууллагаас 30 сая төгрөгийн хандив өгчээ. 

Энэ тухай дэлгэрэнгүй мэдээллийг эндээс үзнэ үү. 

Б.Энэрэл