УИХ-ын чуулганы нэгдсэн хуралдаанд гэр хорооллын дахин төлөвлөлт, орон сууцжуулах хөтөлбөрийн хэрэгжилтийн явцын талаар Ерөнхий сайд У.Хүрэлсүх мэдээлэл хийлээ. Тэрбээр  “Засгийн газрын үйл ажилагааны хөтөлбөрийг хэрэгжүүлэх арга хэмжээний төлөвлөгөөнд зээлийн цар хүрээ, хүртээмжийг нэмэгдүүлэх зорилгоор БХБЯ, Сангийн яам, ТОСК-аас бүрдсэн ажлын хэсэг гарч ажиллуулсан. Зээлдэгчдийн нийт хугацаанд төлөх зээлийн дарамтыг бууруулах, эргэн төлөгдөх эх үүсвэрийг ашиглах саналыг боловсруулж байна. Гэр хорооллын дахин төлөвлөлтийн хэсгээс 5 хүртэл хувийн хүүтэй зээлийн орон сууц авснаар хэрэгжиж байна. ТОСК-ийн захиалгаар ашиглалтад оруулсан 1512 айлын орон сууцны санг байгуулах боломж бүрдээд байна.

1512 айлыг түрээсийн орон сууцанд хамруулаад байна. Барилга угсралт нь дуусаагүй байгаа 1615 айлын орон сууцны барилгыг ашиглалтад оруулж дуусгах шаардлагатай байна.” гэсэн юм.  Ерөнхий сайдын мэдээллийн дараагааар цөөнхийн бүлгийг төлөөлж гишүүн Ж.Батзандан мэдээлэл хийлээ. Тэрбээр “Эдийн засгийн хөгжлийн бодлого гажуудах тал руугаа явж байна. Засгийн газар татвар нэмсэн хуулиудаа цуцлах хэрэгтэйг АН шаардаж байна. Өнөөдрийн мэдээлэл нь албаны олон тоотой, хуурай хоосон амлалт дагуулжээ. Бид МАН-аас мөрөөдлийн жагсаалт хүсээгүй. Ерөнхий сайдын мэдээлэлтэй танилцаж үзээд Засгийн газрын 2016-2020 оны  үйл ажиллагааны мөрийн хөтөлбөрт Аз жаргалтай Улаанбаатар мөрийн хөтөлбөр хэрэгжүүлж, дагуул хот байгуулна гэж заасан. Харамсалтай нь энэ мөрийн хөтөлбөр хэрэгжихгүй байна. АН засаг барьж байх үед орон сууцжуулах хөтөлбөрт бодит бүтээн байгуулалт болж хэрэгжсэн.

Гэр хорооллыг дахин төлөвлөж хөгжүүлэх хүрээнд БНХАУ-ын Эксим банкны хөнгөлөлттэй зээлээр  үргэлжлүүлэхээр тусгагдсан ч валютын ханшны зөрүүнээс гүйцэтгэгч тал алдагдалд орж мэдэхээр байна гэсэн. Үүнийг эргэж харах хэрэгтэй. Өнөөдрийг хүртэл ашиглалтад орох ёстой Ахмадын орон сууц ашиглалтад ороогүй байна. Иргэдийн оролцоотой хэрэгжиж байсан төслүүд зогсонги байдалд орлоо. Гэр хорооллын дахин төлөвлөлтийг эрчимжүүлэх шаардлагатай хэмээв. 

Чуулганы хуралдаан үргэлжилж байна. 

Н.Энх