Уул уурхай, хүнд үйлдвэрийн дэд сайд Д.Загджав “Оюутолгой” компанийн талаар мэдэгдэл хийлээ. Тэрбээр хурлын эхэнд ”Рио Тинто” компанийг Монголын ард түмний нийгэм, эдийн засгийн хөгжилд тодорхой хувь нэмэр оруулахыг шаардав.

Мөн тэрбээр “Рио Тинто” түүний охин компани болох Канад Улсын “Turquoise Hill Ltd” буюу Монголоор “Оюутолгой” компани хөрөнгө оруулалтын гэрээгээр хүлээсэн хэд хэдэн үүргээ биелүүлэхгүй манай орны эрх ашгийг хохироосоор өдийг хүрлээ” гэсэн юм.

Түүний хэлж буйгаар тус компани тээврийн асуудлаа авто болон төмөр замын халь ч хэлбэрээр шийдэж болох ёстой байтал монголчуудын байгуулсан замаар тээвэрлэлт хийж байгаа нь хил дээр урт дараалал үүсэх нөхцөл болж байгаа аж. 

Хоёрдугаарт,  “Оюутолгой” нь Монгол Улсад  цахилгаан станц байгуулах ёстой ч үүнийгээ хэрэгжүүлэхгүй гаднаас жилд 140-150 сая ам.долларын цахилгаан эрчим хүч авч байгаа гэнэ.

Гуравт, зэс хайлуулах үйлдвэр байгуулна гэсэн боловч концентраци хэлбэрээр гурван сая тонн зэсийн баяжмал экспортолж байна гэв.

Түүнчлэн дэд сайд Монголын ард түмний баялгийг олборлон борлуулж хангалттай ашиг олж байгаа энэ компани нийгмийн хариуцлагын хүрээнд санаачлагатай ажиллахгүй, цөөн хүнийг ажилдаа томилж, эд материал мөнгөн тэтгэмж олгож, Өмнөговь аймгийн хөгжилд зориулж жилд таван сая ам.долларын төсөл санхүүжүүлдэг зэргээр дорвитой ажил хийхгүй байгааг шүүмжлэв.   

Тэрбээр “Оюутолгой”-н баялагт түшиглэн Өмнөговь аймгийн Ханбогд сумыг өргөжүүлж, шинэ хот байгуулж болох. Ингэж жижиг ч гэсэн жудаг гаргаж баялагийн эзэн манай ард түмнийг баярлуулмаар байна. Гэтэл “Рио Тинто” Монгол Улсын нэрийг барьж, манай улсын баялгаар том хэмжээний арилжаа хийж, хөрөнгө босгож, хэдэн тэрбумын санхүүжилтийг гаднын орноос авдаг. Тийм байтал манай улсад хөрөнгө оруулахгүй байгаа нь бидний тэвчээр алдрах нэгэн шалтгаан болж байна. Дээр дурдсан 5.4-6 тэрбум ам.долларын хөрөнгийн тэрбум гаруйг нь “Оюутолгой”-д оруулсан байдаг” гэсэн юм.

Тэрбээр хурлын төгсгөлд “Тэвчээрт хязгаар бий. Ийм байдалтай эвлэрч чадахгүй” гэлээ.  

М.Дөлгөөн