Нийслэлд 2018 онд хийгдэх автозамын засвар шинэчлэлтийн ажилтай холбогдуулан автомашины дугаарын хязгаарлалтад түр хугацаанд өөрчлөлт оруулах саналыг НИТХ-аас гаргаад байна. Энэхүү саналыг иргэд дэмжвэл дөрөвдүгээр сарын 15-наас автомашины хөдөлгөөнийг тэгш сондгойгоор хязгаарлах юм.

Замын цагдаагийн уулзварын гүүрэн гарцыг барьснаар огт түгжрэхгүй

Замын цагдаагийн уулзварын гүүрэн гарцын бүтээн байгуулалтын ажлыг энэ оны дөрөвдүгээр сараас эхлэх бөгөөд 1.6 жил үргэлжилнэ. Үүнтэй холбоотойгоор автозамын түгжрэлийг бууруулах зорилгоор тухайн хэсэгт найман жижиг замыг шинээр барих, өргөтгөхөд 1.3 тэрбум төгрөг шаардлагатай байгаа аж. Энэ талаар Нийслэлийн Засаг даргын орлогч П.Баярхүү “Дөрөвдүгээр сарын 15-наас аравдугаар сарын 30-нд уг гүүрийн ул суурь болон тулгуур багана, дам нурууны ажил бүрэн хийгдэж дуусах ажлын төлөвлөгөөг гаргасан. Уг гүүрийн бүтээн байгуулалтын ажлын хүрээнд 96 том тулгуур багана, 470 метрийн урттай А, В, С гэсэн гурван суурьтай багана барина. Уг гүүрийн төмөр зам, автозам нь нэг түвшинд огтлолцдог тул үргэлж хөдөлгөөн удаашралтай, түгжрэлтэй байдаг. Энэхүү гүүрийг барьснаар түгжрэл огт байхгүй болно. Уг төмөр замаар өдөртөө 40 галт тэрэг зорчдог, зорчих тоолонд автомашины хөдөлгөөн хязгаарлагдаж бүх уулзварын түгжрэл үүсдэг. Мөн автомашинтай мөргөлдөх осол аваар маш их гардаг. Энэ асуудал бүрэн шийдэгдэнэ” гэв.

Замын цагдаагийн уулзвар нь  цагт 2500-2800 буюу өдөртөө 20 орчим мянган тээврийн хэрэгсэл зорчдог Улаанбаатар хотын өмнөд хойд хэсгийг холбосон томоохон уулзвар юм. Энэхүү уулзварыг шинээр бүтээн байгуулах ажил хийхтэй холбоотойгоор хаахаар болжээ. Иймд энэхүү уулзварын хөдөлгөөнийг бусад уулзварт нэмэгдүүлэхгүйн тул автомашины дугаарын хязгаарлалтад өөрчлөлт оруулж, тэгш сондгойгоор нь хязгаарлаж, зохицуулах саналыг гаргаад байна. Энэ саналыг иргэд дэмжвэл иргэн долоо хоногт нэг удаа автомашинаа унадаггүй бол энэ зуны бүтээн байгуулалтын үеэр хоёр өдөр автомашинаа унахгүй байхаар зохицуулагдах аж. Тодруулбал даваа, лхагва гарагт 1, 3, 5, 7 9 дугаараар буюу сондгой тоогоор төгссөн автомашин, мягмар, пүрэв гарагт 0, 2, 4, 6, 8 дугаараар буюу тэгш тоогоор төгссөн автомашин хөдөлгөөнд оролцох юм. Харин Баасан, бямба, ням гарагт дугаарын хязгаарлалт үйлчлэхгүй байхаар зохицуулалт хийж, баасан гарагийн замын ачааллыг зохицуулахын тулд амралтын өдрүүдэд болон Баасан гарагт томоохон худалдааны төв болох Нарантуул, Барс, Бөмбөгөр, Хархорин захыг ажлуулахгүй амраах зохицуулалт хийх санал гаргажээ.

Иргэд зөвшөөрөхгүй бол дугаарын хязгаарлалтыг хэвийн үргэлжлүүлнэ 

Иргэдээс автомашины хөдөлгөөнийг тэгш, сондгойгоор хязгаарлах эсэх болон хязгаарлахдаа зөвхөн Бага тойрууд хэрэгжүүлэх эсвэл Саппорогийн уулзвараас Офицеруудын хүртэл  бүсчлэл тогтоох эсэх гэсэн хоёр асуудалд санал авах юм байна. Иргэдийн саналыг маргаашнаас авч эхлэх бөгөөд Нийслэлийн хэвлэл мэдээллийн алба, Нийслэлийн Замын цагдаагийн албаны вэбсайтаар саналыг хүлээн авах ажээ.

Нийслэлийн Засаг даргын орлогч П.Баярхүү сэтгүүлчдийн сонирхсон асуултад хариуллаа.

-Баасан, бямба, ням гарагт худалдааны төв ажиллахгүй гэхээр худалдаа эрхлэгчдэд хохиролтой биш үү?

-Хоёр дахь өдөр амардаг байсныг ажлуулдаг болгоод тав дахь өдөр амруулах зохицуулалт хийгдэж байгаа.

-Такси, нийтийн тээврийн үйлчилгээнд явдаг автомашинуудад тэгш, сондгойгоор хязгаарлах журам үйлчлэх үү?

-Үгүй. Такси, нийтийн тээвэр болон хэвлэл мэдээллийн автомашинууд дугаарын хязгаарлалтгүй хэвийн хөдөлгөөнд оролцоно.

-Иргэд автомашинаа хоёр өдөр унахгүй болохоор нийтийн тээврийн ачаалал нэмэгдэнэ. Үүнийг яаж шийдэх вэ?

-Нийтийн тээврийн 13 чиглэлд автобусыг нэмж гаргахаар төлөвлөж байна. Хэд орчим төгрөгний зардал гарах вэ гэдгийг Нийтийн тээврийн газраас судалж байгаа.

-Хэдий хэр хугацаанд автомашины хөдөлгөөнийг тэгш, сондгойгоор хязгаарлах вэ?

-Иргэд дэмжвэл дөрөвдүгээр сарын 15-наас аравдугаар сарын 30-ний хооронд хэрэгжинэ.

-Иргэд зөвшөөрөхгүй бол яах вэ?

-Тэгвэл одоо хэрэгжиж байгаа журмыг хэвийн мөрдөнө.

-Тэгвэл зам засварын ажил хийгдэх боломж байгаа юу?

-Боломж бий. Гэвч замын түгжрэл улам нэмэгдэж, иргэдэд хүндрэлтэй болно гэсэн үг.

-Иргэдээс хэдий хэр хугацаанд санал авах вэ?

-Маргааш буюу гуравдугаар сарын 28-наас дөрөвдүгээр сарын 15-ныг хүртэл хугацаанд иргэдээс санал авна.

-Зам засварын ажил дууссаны дараа дугаарын хязгаарлалтыг хэрхэн шийдэх вэ?

-Засварын ажлын дараа аль болох дугаарын хязгаарлалтгүй, Нийслэлийн иргэд өдөр бүр автомашинаа унах боломжийг бүрдүүлэхээр зорьж ажиллаж байна.

Г.Тэгшсүрэн