МАН-ын Ерөнхий нарийн бичгийн дарга Д.Амарбаясгалангийн халтуурчдыг цэгцлэх тухай саналыг гараа өргөн дэмжье. Тэрбээр “Таксины үйлчилгээ үзүүлэх эрхгүй мөртлөө өдөржин хотын гудамжаар давхиж ачаалал ихэсгэж байгаа хувийн тэргийг журамлах, торгох, жолоодох эрхийг хаах маягаар хөдөлгөөний ачааллыг бууруулж болно” гэсэн саналыг хэлжээ. Энэ саналыг ажил хэрэг болгож, приус унасан бүхэн таксичин биш гэдгийг ялгаж салгах хэрэгтэй байна.

Толгойтой бүхэн нь машин унаж, халтуур хийж яваа нь худлаа биш. Халхавч нь “амьдрахын төлөө”. “Би амьдрахын төлөө ингэж явж байна” хэмээн улаан цайм илүү мөнгө нэхэж, даварна, уурлана, элдвээр хэлж доромжилно. Хэн ч тэр машинд үхэх гэж суугаагүй. Ажил, амьдралаа зохицуулах гэж хөл дүүжилсэн нь мэдээжийн асуудал.

Бас болоогүй, түгжрэлтэй замын төлбөр гэж илүүг нэхнэ. Километр нь хэдэн төгрөгөөр яваад буй нь тодорхойгүй. Нэг хэсэг нь 800 гэж байхад нөгөө нь 1000 гээд амандаа орсон тоогоо хэлнэ. Хэн ч хянадаггүй, хэн ч зохицуулдаггүй учраас хүссэн бүхэн нь халтуур хийж, хүн шулж, доромжилдог гажиг үйлчилгээ хэвийн үзэгдэл болоод удаж буй.

Тиймээс түгжрэлийн нэг хэсэг болоод байгаа халтуурчдыг цэгцэлье. Жижиг тэрэгтэй бүхэн таксичин биш гэдгийг ялгаж салгая. Албан ёсны такси үйлчилгээтэй болъё. Энэ ажлыг нийслэлийн Тээврийн газар хийх ёстой. Хүнд үйлчлэх нэг хэсгийг нь ТАКСИ гэсэн албан ёсны таних тэмдэгтэй болгож, километрын үнийг нь нэгдсэн байдлаар тогтооё. Харин зам зуураа хүн ачаад, амандаа орсон тоогоо хэлдэг хувийн машинтай нөхдөд хариуцлага тооцъё.

Энэ ажлыг хийсний дараа хотын түгжрэл буурахыг үгүйсгэх аргагүй. Учир нь жижиг тэрэгтэй бүхэн нь өдөржин хотоор сэлгүүцэхгүй. Халтуур хийх боломжгүй учраас ядаж л шатахуунаа хэмнэнэ биз. Хамгийн гол нь иргэдийг тээвэрлэх такси үйлчилгээ эмх цэгцтэй болно. Суусан зорчигч нь ч амьдрахын төлөө явж буйгаа жолоочид ойлгуулах шаардлагагүй. Шулах бус шударга үнэлэгдсэн үйлчилгээг авмаар байна. Дэлхийн метрополис хотын тоонд орсон Улаанбаатарын үйлчилгээ утга учиртай байх ёстой.

Б.Энэрэл