"Хөх Монгол", "Даяар Монгол", "Хамаг Монгол" бүлгэмийн тэргүүн Х.Энхбат жагсаал, цуглааны талаар мэдээлэл /2018.04.04/ хийлээ.

Тэрбээр “Сүүлийн жилүүдэд жагсаал цуглаан хэт замбараагүй болж эхэлж байна. Хэн дуртай нь жагсаал цуглаан хийнэ гэж орилдог болж. Би 1990 оноос хойш олон жагсаалд оролцож, зохион байгуулж явсан. Жагсаал цуглаан гэдэг сэтгэлийн хөөрөлд автсан эсхүл тодорхой эрх ашиг бүхий улстөр юм уу бизнесийн бүлэглэлийн ашиг сонирхлыг хамгаалах гэж хэдэн төгрөг аваад ард түмнийг турхирдаг зүйл биш.

Саяхан Сүхбаатарын талбайд болсон хүүхдийн хүчирхийллийн эсрэг жагсаалыг би харлаа. Тэнд зорилго, бодлого алга. Цаана нь тодорхой хэсэг бүлэг хүн рүү ард түмэн рүү чиглэсэн, хилэгнэлийг замхруулах маягтай цуглаан болсон. Тодорхой хэсэг бүлэг хүмүүс рүү чиглэсэн давалгааг энэ жагсаалаар намжаасан. Хүчирхийллийн эсрэг жагсаал хийх гэж байгаа бол тэр хүчирхийллийн ул үндэс бүрийг нь таслахын төлөө жагсаал хийх ёстой. Жагсаал маш их мөнгөөр явагддаг зүйл. Тийм учраас тухайн жагсаалыг хэн санхүүжүүлж байна вэ гэдгийг ард түмэн анзаарч байх ёстой. Ард түмэн жагсах эрхтэй. Гэхдээ зөв бурууг нь ард түмэн ялгадаг болчихсон. УИХ-ыг тараана гээд л жагсаал хийдэг. Тараах гэж байгаа бол үндэслэлээ эхлээд ард түмэнд танилцуулах ёстой. Түүнээс биш ард түмэн мэдээгүй байхад хэдэн үг хэлээд л УИХ-ыг тараана гэж болохгүй" гэв.

Г.Тэгшсүрэн