Улсын харцага Г.Ганхуяг хулгайгаар буга агнасан гэх тайлбар бүхий зураг сошиалаар тархав. Түүнтэй холбогдож энэ талаар өөрийн байр суурийг нь хуваалцлаа.

Энэхүү зураг нь одоогоос таван жилийн өмнөх зураг аж. БОАЖЯ-наас олгосон зөвшөөрлийн дагуу гадаадын анчин урилгаар манай улсад хүрэлцэн ирж, зурган дээрх бугыг агнасан болохыг тэрбээр хэлж байна.

Улсын харцага Г.Ганхуяг “Хөгшин буганууд согоонуудаа хээлтүүлж чадахгүй сувайруулдаг. Тэгсэн хэр нь залуу бугануудыг ойртуулдаггүй юм. Тиймээс байгалийн жамаараа хөгширсөн бугануудыг гадаадын анчинг урьж авчраад агнуулсан хэрэг. Агнуулах зөвшөөрлийг нь яамнаас өгөөд би дагуулж яваад сумын байгаль орчны байцаагч, цагдаагийн ажилтнуудын хяналт дор агнуулсан. Тэгэхээр үүнд ямар ч хууль бус зүйл, хулгайн ан гэх ойлголт байхгүй. Энэ бол зөвшөөрөлтэй ан. Эргээд тухайн гадаадын анчин сум орон нутагт мөнгө төлдөг. Энэ бугыг агнасан мөнгөний ихэнх хувь нь орон нутгийн байгаль хамгаалах сан, нөхөрлөлд ордог. Тэд бусад бугануудыг хамгаалж, өвс, хужир тавьж өгөх харилцан үүрэгтэй ажилладаг.  Энэ бол ангийн менежмент. Надад үүнээс өөр олон ан хийх үеийн зураг бий. Хамтдаа зураг авхуулсан л төдий. Тэрнээс би агнаагүй юм.  Монгол Гөрөөчин бүлгэм энэ зургийг олж авч пост тавьснаас болоод өнөөдөр энэ зураг фэйсбүүк,твитерээр намайг дэндүү урт насалтал харааж ерөөлөө шүү” хэмээлээ.

Хэт хөгширсөн буга,угалз, янгир нь өөрөө үржилд орж чадахгүй бусад залуу эрэгчингүүдэд боломж олгодоггүй нь  тухайн амьтны өсөлтөд сөргөөр нөлөөлдөг байна. Иймд манай Улс гадаадын анчдад Төрийн байгууллагын зөвшөөрөл, төлбөртэйгээр ан хийлгэдэг бөгөөд төсөвт орсон мөнгийг тухайн амьтдыг хамгаалах, тэжээхэд зарцуулдаг аж. Нэг буга агнахад гадаадын анчин Улсад хэдэн төгрөг төлдөг болохыг лавлахад энэ нь бизнесийн нууц учир олон нийтэд дэлгэх боломжгүй гэв.

Энэхүү зурагтай холбогдуулан Эрүүгийн цагдаагийн газрын Байгаль орчны эсэрг гэмт хэрэгтэй тэмцэх хэлтсээс мэдэгдэл гаргах аж.

Г.Тэгшсүрэн