УИХ-ын чуулганы нэгдсэн хуралдаанаар “Хүүхдийн мөнгөн тэтгэмжийн хамрах хүрээг нэмэгдүүлэх талаар авах арга хэмжээний тухай” болон “Монгол Улсын хүүхэд бүрт хүүхдийн мөнгөн тэтгэмж буюу “Хүүхдийн мөнгө” олгох тухай” Улсын Их Хурлын тогтоолын нэгтгэсэн төслийн анхны хэлэлцүүлгийг хийлээ.  Хэлэлцэж байгаа асуудалтай холбогдуулан гишүүд асуулт тавьж, хариулт авлаа.

УИХ-ын гишүүн Л.Болд:

-Монголын хүүхдүүдийг ялгаварлан мөнгө олгож байна. МАН хүүхдийн мөнгийг хүүхэд бүрт ялгаварлахгүй олгоно гэж сонгуулиар сурталчилж байсан. Ерөнхийлөгч хүүхэд бүрт мөнгө олгох хуулийн төслийг оруулж ирсэн. Хүүхдүүдээ ялгаварлаж болохгүй.

УИХ-ын гишүүн Б.Бат-Эрдэнэ:

-Хүүхдийн мөнгийг 10 хувь нь авдаггүй гэсэн статистик тоо гарсан байсан. 80 хувьд нь хүүхдийн мөнгө олгоно гэж байна. Хүүхдийн мөнгө авах хүсэлтээ гаргасан хүүхдүүдэд мөнгийг нь олгоод явж болохгүй юу? Хүүхдийн мөнгийг социалист үеэс эхлээд хүүхдийн мөнгө олгосоор ирсэн байдаг.

Сангийн сайд Ч.Хүрэлбаатар:

-Авсан зээлээ төлж чадахгүй, валютын ханш чангарч, төгрөгийн ханш унасан. Энэ үед ОУВС-тай хамтарч ажиллах, хөтөлбөр хэрэгжүүлж байгаа. Дээр нь Япон, АНУ зэрэг бусад улс орнуудтай хамтарч ажиллаж байгаа. Хүүхдийн мөнгийг зорилтот бүлгийн 60 хувьд олгоно гэж энэ хүрээнд тогтсон. Хүрэлсүхийн Засгийн газар 60  хувийг 80 хувьд олгох зарчмын хэлэлцээр хийж оруулж ирж байна. Нөхцөл байдал сайжрангуут хэлэлцээр зөрчиж болохгүй. Хүсэлтээ гаргасан өрхийн хүүхдүүдэд өгөх санал гарсныг зөв зүйтэй гэж үзэж байгаа. Тиймээс тогтоолоор хүүхдийн мөнгө авах хүсэлт гаргах санал явуулна. Олон айл өрх хүүхдийн мөнгийг авах саналтай байгаа гэдэгт огт эргэлзэхгүй байгаа.

АН-ын дарга С.Эрдэнэ:

-Өр гэдэг зүйлээр улс төрийн тоглолт хийж та бүхэн 2016 оны сонгуульд ялсан. Одоо бүрэн эрхээ аваад хоёр жил өнгөрлөө. Та бүхэн юу хийж байна. Аймаг, дүүрэг дээр тендэрийн зодоон болж байна. Ч.Хүрэлбаатар сайдын амнаас өр төлсөн гэдэг үг гараад байдаг. ОУВС-гийн бага хүүтэй, урт хугацаатай зээлээр өр авлагаа хааж байна. Нийгмийн тархийг угаахаа болиоч ээ. Та бүхэн яагаад худлаа яриад байгааг асуух гээд байна. Нэг сая гаран хүүхддээ сарын 20 мянган төгрөгийг өгөхдөө ялгаварлаад яваад байх уу?

Сангийн сайд Ч.Хүрэлбаатар:

-Худлаа яриад байгаа зүйл байхгүй. 2.8 их наяд бол зөвхөн дотоодын бонд. Өнгөрсөн долоо сарын хугацаанд 2.8 их наядын төлбөрийг дотоодын бондод төлсөн. Үүнээс гадна гадаад зээлийн хүүг төлж байгаа. 1.4 их наяд төгрөг гэдэг цалин, бас тэтгэврийн сан юм. Айл өрх банкнаас зээл авсан байхад хүүгийн дарамт ямар их байдгийг мэднэ. Тиймээс энэ Засгийн газар хүүгийн дарамтаас эхлээд салгахаар хэлэлцэж байна.

УИХ-ын гишүүн Ж.Батзандан:

-Би эрх баригчдыг Үндсэн хуулиа мөрдөөч гэж шаардаад  байгаа. Хүний эрхийн түгээмэл тунхаглалд нэгдэн орсон нам. Дэлхийн улс орнуудыг харахад хүн ам нь 5 сая хүрчихээд  дотоод эдийн засгаа тэтгэх хэмжээний бодлого.  Ирэх 20 жилийн Монгол Улсын бодлого бол хүн амаа 5 сая болгох. Хүсэлтээр нь өгөх гэдэг нь хүнд суртал бий болгоно. Энэ завхарсан заваан бодлогоо боль. Өөрсдийн компанийн төлөө хичнээн 100 мянгаар нь гаргадаг хэрнээ Монголын хүүхдээс 20 мянган төгрөг харамлаад байна. Мафийн тогтолцооноос гарцгаа. Бид Монголын ард түмэнд үйлчлэх гэж ирсэн болохоос бүлэглэлд үйлчлэх гэж ирээгүй.

Сангийн сайд Ч.Хүрэлбаатар:

-Ой санамж байх хэрэгтэй. 2016 оны төсвийг 2015 онд баталсан. Ингэхдээ хүүхдийн мөнгийг 60 хувьд олгоно гэж баталсан. Хэрвээ бүлэглэл гэж ярьж байгаа бол нэртэй устай нь хэл. Ажлаа хийгээд явж байгаа хүмүүсийг битгий гүтгэ. Юм л бол МАН руу дайрахаа боль.

ЕТГ-ын дарга З.Энхболд:

-Хүүхдийн мөнгийг 80 хувьд олговол цаана нь 107 мянган хүүхэд үлдэж байна. 107 мянган хүүхдэд 12.9 тэрбум төгрөг шаардлагатай байгаа юм. Энэ мөнгө 50 ширхэг жипний мөнгө. Энэ жил 50 ширхэг жип машин худалдаж авахаа л больчих, хүүхдүүдээ мөнгө өг.  

Ийнхүү гишүүд асуулт тавьж, хариулт авлаа. Дараагаар тогтоолын нэгтгэсэн төслүүдийн анхны хэлэлцүүлгийн шатанд гишүүдээс гаргаж, Байнгын хорооноос дэмжигдээгүй зарчмын зөрүүтэй хоёр саналын томъёоллоор санал хураалт явуулж шийдвэрлэв. Ингээд эцсийн хэлэлцүүлэгт бэлтгүүлэхээр холбогдох байнгын хороонд шилжүүллээ. 

Н.Энх