НИТХ-ын дарга С.Амарсайхан, мэргэжлийн хяналтын байгууллагын холбогдох албаныхан өнөөдөр 100 айлын барилгын материалын захыг нүүлгэх чиглэлээр газар дээр нь ажиллалаа.

Эхний ээлжинд зөвшөөрөлгүй аж ахуйн нэгжүүд болон нийтийн эзэмшлийн зам талбайд үйл ажиллагаа явуулж буй ТҮЦ, павилоныг нүүлгэнэ гэдгийг ажлын хэсгийнхэн хэлж байна. 100 айлын нийтийн эзэмшлийн зам талбайд зөвшөөрөлгүй ажиллаж буй 37 ТҮЦ, павилоныг нүүлгэх аж. Мөн суурьшлын бүсэд хориглосон үйл ажиллагаа явуулж буй чулуу, төмрийн 25 үйлдвэрийг нүүлгэх юм байна. Мод модон материалын цех, хаалга цонхны үйлдвэрийг үйл ажиллагаагаа зогсоож, зөвшөөрөгдсөн газарт үйл ажиллагаа явуулах мэдэгдэл өгөөд байна. Мөн 46 байгууллагад өмчилсөн болон эзэмшсэн газраа зориулалтын дагуу ашиглах шаардлагыг тавьжээ.

Энэ үеэр НИТХ-ын дарга С.Амарсайханаас тодруулга авлаа.

-100 айлын барилгын захыг нүүлгэх ажил явагдаж байна. Хэр ахицтай байгаа вэ?

-Энэ зөвхөн 100 айлын худалдааны төв, бизнес эрхлэгчдийн асуудал биш болсон. 2008 онд баталсан Улаанбаатар хотын ерөнхий төлөвлөгөө өнөөдрийг хүртэл хэрэгжээгүй. Энэ орчинд 12 000 айлын орон сууц баригдах ёстой. Гэтэл 10 жилийн хугацаанд 10-хан хувьтай хэрэгжиж байна. Тиймээс хот төлөвлөлтийн бодлогоо дагаж, хэрэгжүүлэх төсөл хөтөлбөрөө хэрэгжүүлж байж Улаанбаатар хот хөгжинө.

100 айл орчмын иргэдийн ажиллаж, амьдрах нөхцөлийг сайжруулах, бизнес эрхлэгчдийн үйл ажиллагааг төвлөрсөн орчинд явуулах боломжийг бий болгох зэргээр бүх талын эрх ашгийг хангахаар ажиллаж байна. Цаашид зам, дэд бүтцийг сайжруулах, орон сууцны VII хороолол төслийг хэрэгжүүлэх сонгон шалгаруулалтыг эрчимжүүлэх олон ажил хийгдэнэ.

-Худалдаа эрхлэгчдийг Налайх руу нүүлгэх орчин нөхцөл бүрдсэн үү? Замын асуудал шийдэгдээгүй тухай ярьж байна.

-Энд олон үйлдвэр үйл ажиллагаа явуулж байгаа. Бид суурьшлын болон үйлдвэрийн бүсээ ялгаж салгах цаг болсон. Тиймээс төмөр, чулуу, шохой, будаг, модны үйлдвэрийг Үйлдвэр технологийн паркид үйл ажиллагаа явуулах орчин нөхцөлийг нь бүрдүүлэх үүднээс зам, дэд бүтцийг шийдэж байна. Тэнд газрыг нь шийдэж өгөөд, төвлөрсөн хэлбэрээр үйл ажиллагаа явуулах боломжийг бүрдүүлнэ.

-Худалдаа эрхлэгчид хөөсөн тухай гомдоллож байна?

-Бизнес эрхлэгчдийг хөөж туусан асуудал байхгүй. Бид газрыг нь гаргаж өгч байгаа. Улаанбаатар хотын баруун, зүүн, зуслангийн чиглэлд тараад үйл ажиллагаа явуулах боломж байгаа. Хотын зүгээс түрээс төлөхгүйгээр газраа эзэмшиж, өмчлөөд үйл ажиллагаа явуулах боломжийг нээж өгч байна.

-100 айлын захыг нүүлгэх тухай олон жил ярилаа. Ажлын бодит үр дүн чухал.

-Шийдэгдсэн асуудал байхгүй гэж харахгүй байна. Шалтиг тоочоод суугаад байвал юу ч хийгдэхгүй. Бид хөгжил яриад ч хэрэггүй. Шийдэл гаргаад, шаардлагатай арга хэмжээнүүдийг аваад, 9, 10, 11, 12 хорооны нутаг дэвсгэрт авч хэрэгжүүлэх ажлаа хийж байгаа. Үр дүн гарч байгаа. Сарын өмнө ямар байдалтай байлаа. Одоо ямар өөрчлөлт гарч байна. 3-5 жилийн дараа энэ орчин ямар байхыг төсөөлөхөд хэцүү биш.

Б.Учрал