ХҮН-аас Монгол Улс ШХАБ-д элсэх асуудлаар ард нийтийн санал асуулга явуулах уриалга гаргалаа. Энэ талаараа өнөөдөр мэдээлэл хийв.  ХҮН-ын дарга Б.Найдалаа “Бид энэ асуудлыг удаан ажиглаж, судалсны үндсэн дээр иргэд болон улс төрийн намуудад хандан уриалга гаргаж байна” хэмээн уриалгаа танилцуулав.

ХҮН-ын Ерөнхий нарийн бичгийн дарга Т.Доржханд “Монгол Улс эдийн засгийн чиглэлээр нэлээд олон байгууллагатай хамтын ажиллагаатай байдаг. Төв азийн бүс нутгийн эдийн засгийн хамтын ажиллагааны байгууллага 31 тэрбум ам.долларын хөрөнгө оруулалт хийсэн байгаа. Үүнээс 600 орчим сая ам.долларыг Монгол Улс авч, төслүүдээ санхүүжүүлсэн.

Харин Шанхайн хамтын ажиллагааны хөтөлбөр тодорхойгүй байна. Бодлого тодорхойлдог хоёр хөршийн нэг нь улс төр, цэргийн асуудал дээр илүү хамтаръя гэдэг бол өмнөд хөрш эдийн засагт илүү оролцоотой байх сонирхолтой, энэ бол зарчмын зөрүү. 

Бид ШХАБ-д орсноороо эдийн засгийн ямар давуу тал бий болох вэ. Монгол Улс ямар үүрэг, эрсдэл хүлээх вэ гэдэг мэдээлэл олж авмаар байна. Дараа нь дүгнэлтээ хиймээр байна. Тэгээд иргэдэд мэдээллийг нээлттэй өгье.

Өнөөдөр эрх барьж байгаа, дөрвөн жилийн хугацаатай албан тушаалтнууд энэ асуудлыг шийдэж болохгүй. Монгол Улсын 50, 100 жилийн хөгжлийн асуудал яригдаж байна. Тиймээс энэ асуудалд хариуцлагатай хандаж, олон нийтийг оролцуулахыг хүсч байна” гэсэн мэдээллийг хүргэлээ.

Б.Учрал