АН-ын бүлгээс мэдээлэл хийлээ. Тус бүлэг УИХ-ын хаврын чуулганы үйл ажиллагаанд үнэлэлт өгч, дүгнэлтээ гаргасан талаар өнөөдөр мэдээлэл өгөв. Улс орны эдийн засаг өсөлттэй байгаа ч иргэдийн амьжиргааг дээшлүүлэх бодитой нэг ч зүйлийг хийгээгүй гэсэн дүгнэлтийг АН-ын бүлэг хийжээ.

Төлөвлөгдсөн гол ажлуудаас бодлогын шинж чанартай, эрхзүйн шинжтэй холбоотой төслүүдийг хаврын чуулганаар хэлэлцэж амжсангүй. Тухайлбал, Үндсэн хуулийн өөрчлөлт, улс төрийн намуудын тухай хууль, Сонгуулийн хуулийг хэлэлцэж амжаагүй. Мөн эдийн засаг ач холбогдолгүй цөөнгүй хуулиуд хэлэлцэж амжаагүй дууслаа гэсэн дүгнэлт хийснээ АН-ын бүлгийн дарга Д.Эрдэнэбат танилцууллаа.

Тэрбээр цааш нь Тавантолгойн асуудлаар байр сууриа илэрхийлээ. Д.Эрдэнэбат “Тавантолгойн ордыг эдийн засгийн эргэлтэд оруулах тогтоолыг УИХ аравхан хоногийн дотор хэлэлцэн баталлаа. Тогтоолд түүхий зүйл маш их бий. Тавантолгойг эдийн засгийн үр ашигтай ажиллуулах ёстой гэсэн байр суурьтай АН нэгдэж байгаа. Тиймээс ч Тавантолгой болон бусад стратегийн том ордуудын асуудлаар хэлэлцээрийн ширээний ард суусан. Бид нэг зүйл дээр ойлголцсон. Тэр нь Тавантолгойг нээлттэй компани болгох бол толгой компанийг нь иргэдийн мэдэлд өгч, нийт монголчуудын баялгаас ашиг хүртэх ёстой гэдэгт ойлголцсон. Харамсалтай нь энд хүрч чадсангүй. Эрх баригчид стратегийн 10 гаруй ордуудыг Тавантолгой шиг тус тусад нь өмчилж авах оролдлогыг хийж байна. Өөрөөр хэлбэл стратегийн бүх ордын нийлбэр Монгол Улсын уул уурхайн баялгийг 15 хэсэг хувааж идэх ойлголт руу явж байна.

Тавантолгойн IPO хийх, түүнийг хэрэгжүүлсний дараа эрх баригчид амлалтаа биелүүлэх ёстой. Ирэх хоёр жилд Монголын эдийн засгийн өсөлт 10 хувьд хүрч, 5800 ажлын байр нэмэгдэж, экспортын орлого 2.5 тэрбум доллараар нэмж өсөн, татварын орлого 400 саяас 1.2 тэрбум доллар нэмж орж ирэх юм байна. Би үүнийг МАН-ын шинэ амлалт гэж харж байгаа.

Эхний амлалтаа хэрэгжүүлж дуусаагүй эрх баригчид Тавантолгойгоор хоёр дахь том амлалтыг авлаа. Бид үүнийг хянаж, хэрэгжүүлэхийг шаардах болно” гэв.

Мөн хоёр сайдыг огцруулах санал гаргасан ч Загсийн газар хүлээж аваагүй. Тиймээс АН-ын бүлэг Үндсэн хуулийн цэцэд хандсанаа мэдээлэв.

Б.Учрал