Манай улсын Төв цэнгэлдэх хүрээлэн 15-хан мянган хүний суудалтай. Гэтэл Монгол Улс 3 сая хүн амтай. Тэднээс хүүхэд, хөгшид, хүүхнүүд гэж үзэн сая хагасыг нь автоматаар хаслаа гэхэд сая гаруй хүн Төрийн их баяр наадмаа төв цэнгэлдэхэд үзэж, торгон ногоон дэвжээ, хүчит бөхчүүдийн дэвээ шавааг нүдээр үзэж баясах хүсэлтэй. Гэвч стадиондоо багтахгүйн “зовлон” бий.

Төв цэнгэлдэхийн 15 мянган суудлын 3500-г жуулчдад хувиарлан, тасалбар худалдаалдаг. Үлдсэн 11500 суудалд ард түмэн “азаа” үздэг. Багтаамжгүйгээс наадмын тасалбарт дугаарласан хүмүүс нанчилдах нь элбэг.  

Өөрсдөө ч багталцахгүй байтал аялал жуулчлалын салбарынхан өнөө 3500 дээрээ дахиад нэмээд 1000 суудлаа жуулчдад  хандивлахыг ард түмнээс хүсэв. Салбарын сайдыг ч ажлыг нь дэмжсэнгүй гэж гомдол нэхсэн. БОАЖ-ын сайд Н.Цэрэнбат  хариуд нь “Ард иргэдийнхээ тоог шууд автоматаар  хасаад жуулчдын тоог нэмэх боломжгүй. Харин наадам дөхөхөөр л энэ асуудлыг ярих биш хоёр жилийн дараа том цэнгэлдэх  барихад аялал жуулчлалын компаниуд   хэдэн төгрөгийн хөрөнгө оруулалт хийх, улсын төсвөөс хэдэн төгрөг гаргах боломжтой вэ гэдгийг ярих ёстой. Энэ жил аялал жуулчлалын компаниудын зүгээс жуулчдад зориулаад наадмын хоёр дахь өдөр наадмын нээлтийг дахин хийх санал гаргасан ч хөрөнгө мөнгөний асуудлаас болоод бүтээгүй” гэв.

“Улаанбаатар хотод 2020 онд Азийн хүүхдийн спортын их наадам, 2023 онд Азийн залуучуудын спортын их наадам болно. Үүнээс өмнө 35 мянган суудалтай цэнгэлдэх хүрээлэн барих асуудлыг шийдвэрлэх шаардлагатай байгааг Нийслэлийн Засаг дарга БНХАУ-ын  “ЧинЖэн”​ группын ерөнхийлөгч Ли Жан Сунд өнгөрсөн онд танилцуулснаар 35 мянган хүний суудалтай шинэ цэнгэлдэх хүрээлэнгийн сураг дуулдаад байгаа.

Сураг төдий байсан энэ мэдээг БОАЖ-ын сайд хоёр жилийн дараа хэмээн ойртуулж, дахин нааштай мэдээ дуулгалаа. Тун удахгүй Монголчууд багтаамжтай, хүртээмжтэй “ТОМ” цэнгэлдэх хүрээлэнтэй болох нь ээ.

Г.Сүрэн