МАН-ын Хяналтын Хорооны дарга Д.Батбаатар хэвлэлийн бага хурал хийлээ. МАН-ын  Хяналтын ерөнхий хороо өчигдөр, өнөөдөр үргэлжлүүлэн хуралдаж, таван асуудал хэлэлцэн шийдвэр гаргажээ. Тэрбээр:

-Сүүлийн хоёр сонгууль дараалан зарим хүмүүсээс "МАН 60 тэрбум"-аар мөнгө босгох гэж байгаа хэмээн хөндөгдөж ирсэн. Үүнтэй холбоотой асуудлыг хууль хяналтын байгууллага шалгаад, ямар нэг зохион байгуулалттай зүйл хийгдээгүй байна гэдэг дүгнэлт гаргасан. Гэхдээ МАН-ын дүрэмд хээл хахууль, ажил албан тушаалыг үнэ мөнгөөр худалдан авахын эсрэг байж, эрс тэмцэхээ заасан байдаг. Харамсалтай нь Нийслэлийн МАН-ын хорооны дарга асан Ц.Сандуй, н.Ганбаатар нар энэ асуудлыг хэлэлцсэн гэдгээ мэдэгдсэн. Уг асуудлаа намын удирдлагад танилцуулах ёстой гэж үзэж тухайн үеийн МАН-ын дарга М.Энхболдод танилцуулахад хүлээж аваагүй байдаг. Тиймээс МАН "60 тэрбум"-ын асуудал оролцоогүй гэдгээ албан ёсоор мэдэгдэж байна. Гэхдээ МАН-ын дүрэм зөрчиж, нэрийг сэвтүүлсэн МАН-ын гишүүн М.Энхболд, Ц.Сандуй, н.Ганбаатар нар ёсзүйн алдаа гаргасан байна гэж дүгнэсэн. Ингээд ёсзүйн хариуцлага тооцох ёстой гэсэн тогтоол гаргалаа. 

Мөн Ховд аймгийн Засаг даргын орлогч н.Батсүхийн асуудлыг хэлэлцэж, албан тушаалд томилогдохын тулд мөнгө тараасан гэдгийг шүүмжилж, авч хэлэлцээд хариуцлага тооцохоор боллоо. Түүнчлэн УИХ дахь МАН-ын бүлгийн гишүүд эв эвдрэлцэж байгааг хэлэлцэж, удирдаж байгаа бүлгийн удирдлагуудтай сахилга хариуцлагын асуудлын нухацтай авч хэлэлцэхээр боллоо. 

Нийслэлийн МАН-ын бага хурал хуралдахгүй байгаа. Тиймээс МАН-ын Удирдах зөвлөлөөс хуралдааны байгаа намын байгууллагуудыг хуралдах товоо зарлаж, эв нэгдлээ хангах тал  дээр эрс шийдэмгий алхам хийхийг үүрэг болгосон. 

Бусад асуудлын хүрээнд иргэн Д.Доржзодовоос "60 тэрбум"-тай холбоотой асуудлаар материал ирүүлснийг хэлэлцлээ. Энэ асуудал хууль хяналтын байгууллагаар шалгагдаж байгаа учир Хяналтны ерөнхий хороо хэлэлцэх шаардлагагүй гэж үзлээ хэмээв. МАН-ын Хяналтын хорооны дарга Д.Батбаатар мэдээлэл хийснийхээ дараа сэтгүүлчдийн сонирхсон асуултад харуиллаа. 

-Ёсзүйн ямар хариуцлагыг М.Энхболд нарын гурван гишүүнд хүлээлгэх вэ?

-Ц.Сандуй, н.Ганбаатар нарт тухайн харъяалагдах намын байгууллагад намын гишүүнээс чөлөөлөх асуудлыг тавихаар болсон. М.Энхболд МАН-ын дарга байх үедээ  намын нэр хүндэд сэв суулгасан явдалд харамсаж байгаагаа илэрхийлсэн хүсэлт ирүүлсэн. Бид үүнийг хэлэлцээд М.Энхболд гишүүн ёсзүйн зөрчил гаргасан учир Удирдах зөвлөлөөр асуудлыг тавьж, хариуцлага тооцох ёстой гэдэг шийдвэр гаргасан. 

Н.Энх