Улсын Их Хурлын гишүүн Д.Муратын гомдлоор сэтгүүлч Д.Майцэцэгт эрүүгийн хэрэг үүсгэн, яллагдагчаар татан, шүүхэд шилжүүлсэн. Өнөөдөр /2018.09.04/  Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхэд шүүх хурал болж, тодорхойгүй хугацаагаар  шүүх хурлыг хойшлуулах шийдвэрийг гаргалаа.

Сэтгүүлч Д.Майцэцэг "Өнөөдрийн шүүх хурлаар шүүгдэгч Д.Майцэцэгийн гэм буруутайг шүүх байсан. Энэхүү шүүх хуралд Сүхбаатар дүүргийн шүүгч Идэр, Нийслэлийн прокурор Мөнхцэцэг, манай өмгөөлөгч Отгонбаяр, шүүгдэгч Майцэцэг миний бие оролцлоо. Өмнөх урьдчилсан хэлэлцүүлгээр гэрч, хохирогчдыг оролцуулах саналыг прокурор Мөнхцэцэг өөрөө тавьсан. Энэ удаагийн шүүх хуралд хохирогч ирээгүй. Гэрч нар биечлэн ирсэн. Гэтэл прокурор гэрчээс татгалзаж, ялимгүй шалтгаанаар гол гэрч нарыг оролцуулахгүй байх шийдвэрийг гаргасан. Шүүх хурлын явц хэт нэг талыг барьсан, мэтгэлцээний үндсэн дээр явагдахгүй, манай өмгөөлөгчийн үг хэлэх эрхийг хязгаарлах байдалтайгаар үргэлжилсэн учраас манай өмгөөлөгч болон миний бие Сүхбаатар дүүргийн шүүгч Идэр болон Нийслэлийн прокурор Мөнхцэцэг нараас татгалзах хүсэлтээ шүүхэд өглөө. Ерөнхий шүүгч тодорхойгүй хугацаагаар шүүх хурлыг хойшлуулах шийдвэр гаргалаа" гэв

Сэтгүүлч Д.Майцэцэгийг хүний хувийн мэдээллийг хууль бусаар олж авсан, задруулсан гэх хоёр тусдаа зүйл ангиар эрүүгийн хэрэг үүсгэн яллагдагчаар татсан боловч мэдээллийг хууль бусаар олж авсан гэх хэргийг хэрэгсэхгүй болгож, хувийн нууц задруулсан гэх эрүүгийн хэрэгт яллагдагчаар татаад байна.

Г.Сүрэн