МАХН бусад улс  төрийн хүчинтэй хамтран Дээд Үндсэн хуулийн төсөл боловсруулан, хэлэлцүүлж байгаа. Үүнтэй холбогдуулан МАХН-аас хэвлэлийн хурал хийлээ. МАХН-ын дэд дарга Ц.Оюунбаатар:

-Бид хариуцлагатай төрийг зохион байгуулж, ирээдүйн хөгжлийн бодлогоо хамтран зохион байгуулна. Үүнд МАХН-ын нөр их хөдөлмөр шийдвэрлэх ач холбогдолтой. Бид өнгөрснөө ярьж, чичилж биш хөгжлийн бодлогоо хэрэгжүүлье гэж байгаа юм.

Энэ намрын чуулганаар шийдвэртэй алхмуудыг хийх ёстой гэж бид үзэж байна. Түүний дотор Хэнтий аймгийн УИХ-ын  42 дугаар тойргийн ард иргэдийн шаардлагаар сонгох эрхийг нь Үндсэн  хуульд заасан эрхийг эдлүүлэхэд чиглэсэн үйл ажиллагаа байх болно. Шударга ёсыг шаардаж байгаа улс төрийн хүчин ард иргэдтэй хамтарч ажиллана. ҮХЦ сонгууль хэзээ явуулахыг заадаг, товлодог байгууллага биш. Бохир улс төр явж байгааг бид эсэргүүцэн тэмцэх болно. Хэнтий аймгийн 17 мянган сонгогчийн 5000 нь нөхөн сонгууль явуулахыг шаардсан бичгийг ирүүлээд байгаа. Үүнийг ҮХЦ-д өргөн барина. Бусдыг хэлмэгдүүлэх явдлыг таслан зогсоох ёстой.  

МАХН-ын нарийн бичгийн дарга Ц.Шаравдорж:

-УДШ бол Үндсэн хуульд заасан заалттай нийцсэн эсэхийг хянаж улс төрийн намын дүрмийг баталдаг. МАХН-ын дүрэм, мөрийн хөтөлбөрийг энэ дагуу УДШ бүртгэлээ. МАХН бол хуулийг баримталдаг, бодлого, үйл ажиллагаа нь ил тод улс төрийн хүчин. Энэ дагуу манай ээлжит бус чуулган явагдаж, дүрэм, мөрийн хөтөлбөрөө шинэчилж, баталснаа УДШ-д бүртгүүлж байгаа юм. Ээлжит бус чуулганыг зарлан хуралдуулах тухай МАХН-ын даргын шийдвэр гарч, бага чуулган хуралдаж, 1044 гишүүн Их хурлын төлөөлөгчөөр сонгогдсон. Энэ чуулганаас гарсан бүхий л баримт бичиг, дүрмийг 100 хувийн саналаар баталсан.

Тэд мэдээлэл хийснийхээ дараа сэтгүүлчдийн сонирхсон асуултад хариулав. 

-Шинэ Дээд Үндсэн хуулийг ард түмнээр хэлэлцүүлсний дараагаар эрх баригчид хэр хүлээж авах бол?

-МАХН ээлжит бус их чуулганаа хийхдээ хэн нэгэнтэй хариуцлага тооцох, хэн нэгний эрх ашгийг бодож энэ чуулганыг хийгээгүй. МАХН хариуцлагагүй байдлыг цэгцлэхийн төлөө юу хийх ёстойгоо хэлэлцсэн. Ийм учраас ээлжит бус чуулганаас гаргасан шийдвэр хэн нэгнийг онцгойлон ярих гээгүй.

Н.Энх