Монголын сэтгүүлчдийн нэгдсэн эвлэлээс мэдээлэл хийж, “Сэтгүүлч Ордон” баригдахаар болсныг хэвлэлийнхэнд дуулгалаа. Дэлхийн хэвлэлийн эрх чөлөөний өдрөөр нийслэлийн Засаг дарга С.Батболд сэтгүүлчдийн орон сууц барих газрыг шийдэж өгнө хэмээн амалсан. Тэрбээр амлалтаа биелүүлж, сэтгүүлчдийн орон сууц барих газрыг шийдэж өгчээ. Сүхбаатар дүүргийн нутаг, 32-ын тойрог орчмын тус газарт “Сэтгүүлч ордон” баригдана. Тус барилгын зургийг боловсруулах компанитай өнөөдөр гэрээ байгуулж, 16 давхар “Сэтгүүлч ордон”-ы ажил эхэлж байна.
МСНЭ-ийн ерөнхийлөгч Х.Мандахбаяр “МСНЭ 2018-2022 оны хооронд томоохон мөрийн хөтөлбөр хэрэгжүүлнэ. Энэ мөрийн хөтөлбөрт сэтгүүлчдийг хямд, чанартай орон сууцаар хангах Сэтгүүлч Ордон байгуулах зорилтыг бид дэвшүүлсэн.
Бид хараат бус, чөлөөт хэвлэл мэдээллийн тухай ярьдаг. Сэтгүүлчид хариуцлагатай, ёсзүйтэй байх ярьдаг. Сэтгүүлчийн нийгмийн асуудлыг шийдэхгүйгээр дараагийн хөгжлийн асуудлыг ярихад түвэгтэй. Тиймээс ажил авснаас хойш хагас жилийн хугацаанд энэ чиглэл рүү илүү анхаарч ажилласан. 2018-2022 оны бүрэн эрхийн хугацаанд 1000 сэтгүүлчийг орон сууцаар хангах ажлаа бүрэн хийнэ” хэмээн ярилаа.
1000 сэтгүүлчийг орон сууцжуулах энэ ажлын эхлэл өнөөдөр тавигдаж, МСНЭ-ийн ерөнхийлөгч Х.Мандахбаяр, “Шинэ гарц” компанийн ерөнхий захирал Б.Бадамрагчаа нар гэрээнд гарын үсэг зурлаа. Тус гэрээний дагуу эхний ээлжинд 400 сэтгүүлч орон сууцтай болно.
“Шинэ гарц” барилгын компанитай хамтран эхний ээлжинд 400 сэтгүүлчийг мкв нь 1 99 000 төгрөгийн үнэтэй орон сууцанд оруулна. Сэтгүүлчдийн байгууллагатай хамтран хэрэгжүүлж буй уг төслийн талаар “Шинэ гарц” компанийн ерөнхий захирал Б.Бадамрагчаа “Бид МСНЭ-ээс тавьсан саналыг судалж үзэн, эхний ээлжинд 400 сэтгүүлчийг Шинэ гүрэн төсөлдөө хамруулж, хямд өртөгтэй орон сууцаар хангах гэрээнд гарын үсэг зурж байна. Сэтгүүлчид бол тогтвортой хөгжлийн гол хөдөлгөгч хүч. Мөн ардчиллын хамгийн дээд үнэт зүйлс болсон сэтгүүлчдийн амьдрал ахуйг дээшлүүлэх төсөл гар бие оролцож байгаадаа баяртай байна” хэмээн ярилаа. Мөн тэрбээр чанарыг амлахаас гадна сэтгүүлчдэд хамгийн эхний ээлжийн орон сууцнаас хуваарилна гэдгээ хэллээ.
“Шинэ гарц” компанийн барьж буй Шинэ гүрэн хороолол нь Баянзүрх дүүргийн тавдугаар хорооны нутаг дэвсгэрт байрлана. Нийт 1620 айлын Шинэ гүрэн хорооллын анхны үнэ нь 2.3 сая төгрөг аж. Харин сэтгүүлчдэд хөнгөлөлттэй буюу 1 99 000 төгрөгөөр зарах юм байна.
Б.Учрал