Монгол Улсад бүртгэгдэж байгаа нийт зам тээврийн ослын 60 гаруй хувь нь орон нутгийн замд гардаг. Ослын улмаас нас барагсадын 70 гаруй хувь нь орон нутгийн замд гарсан ослоос үүдэлтэй. Тиймээс цагдаагийн байгууллагаас “Орон нутгийн зам-Хөдөлгөөний соёл” аяныг өрнүүлж, өнөөдөр үр дүнгээ тайлагналаа.

Аяны хүрээнд цөөнгүй бодитой ажил хийсэн гэдгийг ЗЦА-ны Урьдчилан сэргийлэх хэлтсийн дарга, цагдаагийн хурандаа Э.Бөхбат хэллээ. Тухайлбал, Засгийн газрын тогтоолын дагуу 40 цэгт байгуулах постын 50 хувийг байгуулж, 24 цагийн үйлчилгээтэй болгожээ. Мөн 21 аймгийг өндөр түвшний хурд хэмжигчтэй болгосон байна. Үүнээс гадна осол ихээр гардаг “хар цэг”-үүдэд явуулын пост ажиллуулж эхэлсэн байна. Цаашид явуулын постын тоог нэмэгдүүлнэ. Өөрөөр хэлбэл осол, гэмт хэрэг ихээр гардаг замуудад Монголын цагдаа хаана ч, хэзээ ч байж магадгүй гэсэн үг юм.

Орон нутгийн замд хийсэн гурван цагийн шалгалтаар гурван согтуу жолооч илэрсэн байна. Долоон хүн тээвэрлэсэн приус маркийн машины жолооч 79 хувийн согтуурлын зэрэгтэй байсныг илрүүлсэн байна.    

Дөрвөн сарын хугацаанд үргэлжилж, 500 цагдааг татан оролцуулсан “Орон нутгийн зам-Хөдөлгөөний соёл” аяны үр дүнд:

-Бүртгэгдсэн нийт гэмт хэрэг 25.3 хувиар

-Гэмтсэн хүн 29.4 хувиар

-Амь нас нь хохирсон хүн 18.3 хувиар буурсан байна.

Товчхондоо орон нутгийн замд өрнүүлсэн энэ аянаар 20 хүний амь нас аварсан гэдгийг хурандаа Э.Бөхбат хэлж байна.

Б.Учрал