УИХ-ын чуулганы нэгдсэн хуралдаан эхэллээ. Жижиг, дунд үйлдвэр, үйлчилгээг дэмжих тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг үргэлжлүүлэн хийж байна. Хуулийн төсөлтэй холбогдуулан зарчмын зөрүүтэй саналаар санал хураалт явуулж байгаа юм. 

Хэлэлцэж байгаа асуудалтай холбогдуулан гишүүн Ц.Мөнх-Оргил "Бүх төрлийн сангуудад хяналт тавих тусгайлсан хууль хэрэгтэй. Ингэснээр сангуудын үйл ажиллагааг жигдэлнэ" гэсэн бол гишүүн А.Амарзаяа "Аймаг орон нутгийн эрхзүйн чадамжийг энэ хуулийн төсөлд бүрэн авч үзэх хэрэгтэй. Аймаг, сум бүр ЖДҮ-ийг хөгжүүлэх сантай. Энэ сангийн хөрөнгө санхүүг орон нутаг өөрөө бие даан зохицуулах хэрэгтэй. ЖДҮ-ийг хөгжүүлэх санд Сангийн яамнаас нэг ч төгрөг тусгаагүй байсан. Харин ч УИХ-ын гишүүнд 47 тэрбум төгрөгийг тусгуулсан" гэлээ.  УИХ-ын гишүүн М.Билэгт:

-ЖДҮ-ийг дэмжих сан хөдөө орон нутагт хүртдэггүй. Яаман дээр нэг хэсэгхэн хүмүүс ЖДҮ-ийг хөгжүүлэх сангийн зээлийг  төсөл бичээд аваад сурчихсан байдаг. Тиймээс бид өнөөдөр нийслэлийн төвлөрлийг бууруулъя, иргэдээ ажилтай болгоё гэж ярьж байгаа. Монгол Улс хүн ам цөөтэй, өргөн уудам газар нутагтай. Тиймээс хөдөө орон нутагт ЖДҮ-ийн зээлийг хуваарилах эрхийг нь олгож өгөөрэй, хуулиараа гэлээ. УИХ-ын дарга М.Энхболд:

-Хууль санаачлагачид гишүүдийн саналыг харгалзаарай. Ер нь ЖДҮ-ийг хөгжүүлэх зээлийг хотод төвлөрүүлэхгүй, орон нутагт нь шийдэх хэрэгтэй. Тухайн орон нутагт шаардлагатай байгаа зээлд олгох тал дээр анхаараарай гэлээ. 

Чуулганы хуралдаан үргэлжилж байна. 

Н.Энх