2019 оны Монгол Улсын төсөвт Ерөнхийлөгч хориг тавьсан. Ерөнхийлөгчийн хоригийг Төсвийн болон Хуульзүйн байнгын хороо хэлэлцээд хүлээж авахыг дэмжсэнгүй. Үүнтэй холбогдуулан ЕТГ-ын дарга З.Энхболдоос зарим зүйлийг тодрууллаа.
-Хоригийг хүлээж авахыг байнгын хороод дэмжсэнгүй. Гишүүдийн хэлж байгаа үндэслэлтэй санал нийлж байна уу?
-Ц.Мөнх-Оргил, Н.Оюундарийн ярьж байгаа зүйл бүгд худлаа. Тэд ажлаа мэдэхгүй байна.
-Гишүүд хэсэгчилж хориг тавьсан бол дэмжих боломжтой байсан гэх зүйл хэлж байсан?
-Төсөв зузаан ном байгаа. Төсөвт туссан хэдэн зуун обьектуудыг нааш цааш нь хөдөлгөж болдоггүй. Ерөнхийлөгч хаанаас нь хасаад, хаана нь нэмэхийг Ерөнхийлөгч хэлж болдоггүй, УИХ, Засгийн газрын ажил. Тиймээс Ерөнхийлөгч бүхэлд нь хориг тавьж, дараа нь өөрчлөлтийг чөлөөтэй хийх суурийг тавьж өгсөн.
-Хоригт 500 тэрбум төгрөгийг дагалдуулах шаардлага байсан уу?
-Эдийн засаг уул уурхайгаас хараат болсон. Тиймээс жил бүр гардаг 15 сая малынхаа түүхийг эдийг боловсруулдаг болохгүй бол хямрал үргэлжилнэ. Хятад улс дэлхий даяар хоёр сар нүүрс авахаа больчихлоо. Ирэх жил нүүрс авахыг бүү мэд. Гэтэл ирэх оны төсөвт нүүрснээс энэ жилийнхээсээ илүү орлого олно, илүү үнээр зарна гэдэг бүтэхгүй.
Н.Энх