Монгол бөхийн өргөөний үйл ажиллагааг өнгөрөгч дөрөвдүгээр сарын 14-ны өдрөөс түр зогсоогоод байгаа.

Монголын Үндэсний бөх хоёр ч холбоотой болж, багагүй хугацаанд маргаантай буй. Энэ маргаанаас үүдэн Бөхийн өргөөг булаацалдаж, хэд хэдэн удаа хаалгыг эвдэж, танхайрсан тохиолдол ч гарсан. Улмаар Зөрчил шалган шийдвэрлэх тухай хуулийн 5.3-т заасныг үндэслэн барилга байгууламж, хүний амь бие, эрүүл мэндэд  хохирол учирч болзошгүй байх тул прокурорын зөвшөөрлөөр Баянзүрх дүүргийн цагдаагийн II хэлтсээс  үйл ажиллагааг нь түр зогсоосон.

Тэгвэл өнөөдөр Дархан аварга Х.Баянмөнх, Б.Бат-Эрдэнэ нар уулзаж, эв зүйгээ ололцсон байна. Дархан аварга Б.Бат-Эрдэнэ “Бөхчүүдийн түр зөвлөл байгуулж хамтран ажиллах юуны түрүүн Бөхийн өргөөг нээж хэвийн үйл ажиллагааг эхлүүлэхээр боллоо” гэв.

Харин Дархан аварга Х.Баянмөнх “Бөхийн холбоонд үүсээд байгаа асуудлыг чи бид хоёрыг л шийдэх ёстой гэж бөхчүүд ч Бөхийн өргөөний ажилчид ч хэлж байна. “Бид нэгдлээ. Одоо Бөхийн өргөөг онгойлгоод өгөөч” гэж хуулийн байгууллагад хандана. Өнөөдөр орой гэхэд Бөхийн өргөө нээгдэж, хоёулаа баяртайгаар уулзана байх” хэмээв.

Г.Сүрэн