УИХ-ын чуулганы өнөөдрийн нэгдсэн хуралдаан мөн хойшиллоо. УИХ-ын гишүүдийн ирц бүрдээгүйн дээр УИХ дахь МАН-ын бүлгийн дарга Д.Тогтохсүрэн чуулганы нэгдсэн хуралдааныг хойшлуулах санал гаргалаа. Тэрбээр ирэх даваа гаригт болох бүлгийн хуралдааныг хуралдах хүртэл чуулганы хуралдааныг хойшлуулах санал гаргаснаар өнөөдрийг хуралдаан хойшиллоо.

УИХ-ын дарга М.Энхболд “Өчигдөр оройноос эхлээд Ерөнхийлөгч УИХ-ын тухай хууль, УИХ-ын дэгийн тухай хуульд нэмэлт өөрчлөлт оруулах тухай хуулийн төсөл санаачилж, Тамгын газар иж бүрдлийг нь үзэж, өнөөдөр өглөө хуулийн төслийг би хүлээж авсан. Энэ төслийг Төрийн байгуулалтын байнгын хороонд шилжүүлсэн байгаа.  Чуулганы хуралдааны дэгийн дагуу энэ асуудлаа хэлэлцэж, ярина.

УИХ-ын гишүүд ирцээ бүрдүүлж, гацаанд орсон байдалд үнэлэлт дүгнэлт хийж, дараа дараагийн чуулганд бүрэн дүүрэн ирж, идэвхтэй оролцох шаардлагатай байна” хэмээн хэлж, чуулганы өнөөдрийн хуралдааныг хаалаа.

Ингэснээр УИХ-ын чуулганы нэгдсэн хуралдаан 10 дахь удаагаа хойшиллоо.

Б.Учрал