МАН-ын дарга У.Хүрэлсүхийн өгсөн чиглэлийн дагуу НИТХ-ын төлөөлөгч С.Мөнхчулуун, Ц.Сандуй нарыг МАН-аас хөөлөө. Гэхдээ МАН-ын Хяналтын хорооны шийдвэрээр тэднийг намаас гарсанд тооцжээ. Намаас хаслаа, хөөлөө гэхийн боловсон хэлбэр бололтой.

Ц.Сандуйг УИХ-ын дарга асан М.Энхболдын хамсаатан учраас түүний араас явуулав. МАН-ын нэр хүндийг унагаасан 60 тэрбумын асуудлаар түүнийг хөөсөн нь энэ. Хөөгөөд, буцааж аваад, дахиад хөөхөд хангалттай хүрэлцэх хугацаа өнгөрсөн ч хувьсгалын тохироо нь өнөө бүрдэж буй бололтой. 60 тэрбумын хэргийг улиг болтол ярьж, өдгөө тэр нь үлгэр болохдоо тулаад буй шүү дээ.

Харин С.Мөнхчулууныг намын бодлого дагаагүй “эсэргүү” хэмээн хөөлөө. Тэр нь заалнаас нэр дэвшиж, хотын даргад МАН-ын Удирдах зөвлөлөөс нэр дэвшүүлсэн НИТХ-ын дарга С.Амарсайханыг ялсан. Товчхондоо ноёны бөхийг унагаасан учраас хөөгдөх “ялтай”. Энэ ч дагуу хөөгдөж, тэд нам бус төлөөлөгчид болов.

Одоо дахин хотын даргын асуудал яригдана. Ерөнхий сайд, МАН-ын дарга У.Хүрэлсүх унасан бөхөө дахин зодоглуулах эсэх нь тодорхойгүй. Харин нам бус С.Мөнхчулууны хувьд дахин нэрээ дэвшүүлэхээ хэвлэлээр мэдэгдээд буй. Тэр өөрийг нь дэмжсэн НИТХ-ын 24 төлөөлөгч болоод нийслэлчүүдийн итгэл найдварыг хүлээсэн учраас хотын даргад дахин нэр дэвших хүсэлтэй. Харин  МАН-аас намаас гарсан тохиолдолд улс төрийн дэмжлэг үзүүлэхгүй гэдгээ мэдэгдсэн. Ямар ч сонгуульд нэр дэвших боломж олгохгүй гэсэн үг. Тиймээс тэр энэ удаа нам бус төлөөлөгчийн хувиар нэр дэвшинэ. Хэрэв дахин олонхын санал авбал Улаанбаатар хот нам бус даргатай болно. Гэвч Ерөнхий сайд хэнийг сойх болоод хэрхэн найруулга хийхээс С.Мөнхчулууны улс төрийн карьер шууд хамаарна.

М.Болд