АТГ-ын дарга, дэд даргыг чөлөөлж оронд нь “шударга бусын хонгилд” хамааралгүй, мэргэжлийн, шударга албан хаагчдыг томилох тухай асуудал ид яригдаж байгаа энэ үед хууль, хяналтын байгуулгын ажилтнууд хурандаа Д.Цогтбаатарыг энэ цаг үед Монголын төрд хэрэгтэй хүн хэмээн үгүйлж байна.

Донровын Цогтбаатар нь 1974 онд хотод төрсөн. МУИС, ОХУ-ын Холбооны аюулгүй байдлын албаны Академи, тус Академийн докторантурыг тус тус төгсчээ.

1998 оноос ТЕГ-т ажилтнаас тасаг, хэлтэс, газрын дарга хүртэл албыг мерит зарчмаар шатлан хаасан ба ТЕГ-ын Сөрөх тагнуулын газрын даргаар хоёр удаа томилогдож ажилласан байна.

Д.Цогтбаатар нь “шударга бусын хонгилоор” орж, хилс хэрэгт шийтгүүлэн хэлмэгдсэн олон албан хаагчдын нэг бөгөөд хууль хяналтын байгууллагад үүсээд байгаа явцуурал, албан тушаалтны зоргоор байдлыг биеэр амсаж, таньж мэдсэн хүн учраас яг одоо АТГ-т шударга ёсыг сахиулж чадах итгэлтэй хүн хэмээн үзэж байгаа юм.

Тэрбээр Ерөнхийлөгч асан Ц.Элбэгдорж 2009 онд сонгуулийн хандив нэрээр Өмнөд солонгосын иргэд, байгууллагаас хандив авсан хэргийг анх илрүүлж, илчилснээсээ болоод Ц.Элбэгдоржийн занаанд орж, түүний гар хөл болсон хүмүүст ад үзэгдэн хавчигдаж, улмаар хилс хэрэг тулгуулан шийтгэгдсэн хүн ажээ. Монгол Улсын сонгуулийн тухай болон Ерөнхийлөгчийн сонгуулийн тухай хуульд гадаадын иргэдээс хандив авахыг хатуу хориглосон байдаг. Гаднын иргэд, байгууллагаас хандив мөнгө авсан бол шууд эгүүлэн татах заалт хуульд бий.

Тийм учраас хандив авсан хэргээ дарагдуулахаар Ц.Элбэгдорж машид хичээж байсны дээр 2010 оны 10 дугаар сарын 14-ний шөнө БНСУ-ын 13 иргэд хилээр 13.5 кг алт хууль бусаар гаргах гэж байгаад тагнуулынханд саатуулагдсан хэрэгт шууд нөлөөлөн суллуулж байжээ.

Энэ хэргийг Ц.Элбэгдоржийн заавраар хууль хяналтынхан шалгаагүй, эзэн холбогдогчид нь бүгд нутаг буцсан байна. Сонирхолтой нь өнөөдөр хэл аманд ороод байгаа тэр үед Нийслэлийн прокурор асан Е.Сагсай “Солонгос Монгол Улс хоорондын хамтын ажиллагааны гэрээний дагуу сэжигтнүүдийг БНСУ-ын талд шилжүүлсэн” хэмээн ам таглаж байсан аж.

Д.Цогтбаатар 2014 оны 5 дугаар сарын 22-нд алдарт Төв аймгийн шоронд хоригдож байх үедээ  Ил захидал бичсэн нь хэвлэлээр гарч байлаа. Тэрбээр захидалдаа: … намайг буруутгах зорилго бүхий тодорхой хүний зохион байгуулалттай, хууль бус үйл ажиллагааны улмаас 2013 оны тавдугаар сараас эхлэн өнөөдрийн байдлаар огт үндэслэлгүй 3 эрүүгийн хэрэгт, миний эхнэр мөн л ямар ч хамааралгүй атлаа 1 эрүүгийн хэрэгт холбогдож эдгээр нь өнөөдрийг хүртэл нэг нь ч эцэслэн шийдэгдээгүй байна. Д.Цогтбаатар би төрийн эрх бүхий байгууллагуудын шалгалтын үйл ажиллагааг хүндэтгэж бүх зүйл хуулийн дагуу шийдвэрлэгдэнэ гэсэн итгэл үнэмшлээр өнөөг хүргэсэн боловч өнгөрсөн бүтэн жилийн хугацаанд намайг үндэслэлгүйгээр мөрдөн мөшгөх, гэмт хэрэгт холбогдуулах, цагдан хорих заналхийлэх зэргээр хохироох явдал хэрээс хэтэрсэн” хэмээн дурдаж байв. Маш ноцтой мэдээлэл байгаа нь: “…намайг яллах талыг баримталж ЭБШХ-ийг явуулах төдийгүй мөрдөн байцаагч Тулгыг Б.Хурц АТГ-т дуудаж уулзан; ... чи Д.Цогтбаатарыг заавал,  яаж ийж байгаад эрүүгийн хариуцлагад татуулна шүү... гэж нөлөөлсөн явдал ч гарч байв.

Мөн 2012 оны 12 дугаар сард намайг сануулж хэлсээр атал (2013 оны ерөнхийлөгчийн сонгуульд хууль бусаар ашиглагдаж болзошгүйг) ямар ч арга хэмжээ аваагүйгээр үл барам эсрэгээр нь Д.Цогтбаатар намайг Ерөнхийлөгчийн эсрэг үйл ажиллагаа зохион байгуулсан гэх гүтгэлгийг тарааж байсан болно. …Хэдийгээр үнэмшилгүй мэт санагдаж болох ч Б.Хурц нь зөвхөн намайг буруутгах үүднээс ТЕГ-ын удаан хугацаанд хуулийн дагуу явуулсан ажлын үр дүн болох 2 хэргийг шүүхээр хэрэгсэхгүй болгох, цагаатгах шийдвэрийг гаргуулаад байна” гэж илчлэн бичсэн байсныг хэн ч анзаарч тоож байсангүй нь хачирхалтай.

АТГ-ын дарга болон дэд даргын аль нэгэнд бэлтгэгдсэн боловсон хүчин, хатуужсан хурандаа Д.Цогбаатарыг томилвоос “шударга бусын хонгилд” дарагдан, хэрэгсэхгүй болгосон албан тушаалтнуудын маш олон хэргийг шуурхай шийдвэрлэх нь дамжиггүй. Үүнийг холбогдох хүмүүс анхаараасай хэмээхдээ тэрлэв.

Ахмад дайчин Ё.Пэрэнлэй