Хуульзүйн байнгын хорооны хуралдаанаар АТГ-ын удирдлагыг чөлөөлөх, томилох асуудлыг хэлэлцэв. Хуралдаанд АТГ-ын дарга Х.Энхжаргал, дэд дарга Ц.Нямдорж нар оролцсон юм. Хэлэлцэж байгаа асуудалтай холбогдуулан УИХ-ын гишүүн С.Бямбацогт:

-АТГ-т ажиллаж байхад нөхцөл байдал хэр байв. Яаж ажиллав. Авлигын индекс ямар байна вэ? Дуулиан шуугиан дагуулсан хэргүүдийг цаашид хэрхэн шийдвэрлэх бололцоотой вэ?

АТГ-ын дарга Х.Энхжаргал:

-Бүх зүйл ил тод байсан. Намайг томилогдож байсан 2.10 сарын хугацаанд авлигын индексийн байдал 72 байснаа 92 болоод энэ жил 103 болсон. Хамгийн их саад болсон зүйл нь баахан бондуудыг гаднаас зээлж аваад, 33 их наяд төгрөгийн зээлийг Өршөөлийн хуульд хамруулж өршөөсөн. Энэ нь олон улсын байгууллагад Монголын нэрийг харлуулсан. Өнгөрсөн хугацаанд АТГ-ын сайхан залуучуудтай хамтарч, энэ бүх хэргийг  шалгаж байлаа.

10-аад хоногийн өмнө би Ерөнхийлөгч, Оюутолгойн гэрээг   шалгах УИХ-ын ажлын хэсэгт Оюутолгойн гэрээтэй холбоотой шалгасан материалыг өгсөн. Энэ бол маш том хэрэг байсан. Бид үүн дээр амжилттай сайн ажиллаж, үүнийг зайлшгүй цааш шалгах ёстой.

Бусад анхаарал татсан хэргүүдэд 3 боть, 29 хэргийг Ерөнхий прокурорт  өнөөдөр 15:00 цагт  уулзахдаа өгнө.

Хуульзүйн байнгын хорооны дарга Ш.Раднаасэд:

-Хичнээн их наяд төгрөгийн хэрэг халхавчлагдсан бэ?

-Оюутолгойн  хэрэг 90-ээд хувьтай байгаа. Ерөнхий прокурорт танилцуулсан. 33 их наяд гэдэг дээр хэрэг бүртгэлт, мөрдөн байцаалт явуулж болохгүй, нууцлалтай байгаа. Үүн дээр л гол нь авлигын индекс яригдаж байгаа.

Ийнхүү Хуульзүйн байнгын хорооны хуралдаанаар АТГ-ын даргаас Х.Энхжаргал, дэд даргаас Ц.Нямдоржийг чөлөөлөхийг, АТГ-ын дарга З.Дашдаваа, дэд даргад Ж.Батсайхан нарыг томилохийг тус тус дэмжсэн юм.

Н.Энх