Төсвийн байнгын хороо хуралдав. Хуралдаанаар Ерөнхий аудиторыг чөлөөлөх, томилох асуудлыг хэлэлцэв. Ерөнхий аудитор Д.Хүрэлбаатарыг чөлөөлж, Д.Занданбатыг томилох асуудлаар гишүүд асуулт тавьж хариулт авав. УИХ-ын гишүүн Б.Пүрэвдорж:

-Ерөнхий аудитор албан тушаалаасаа чөлөөлөгдөх өргөдлөө өгөөгүй байхад яагаад томилох асуудлыг оруулж ирж байна вэ? "Эрдэнэт"-ийг төрийн  аудит шалгахгүй байна. "Эрдэнэт" үйлдвэрт бараа бүтээгдэхүүн шахдаг. Үйл ажиллагаатай нь холбоотой аудит хийж, олон нийтэд ил болгож, буруутай этгээдүүдийг гаргаж чадах уу?

УИХ-ын дарга Г.Занданшатар:

-Ерөнхий аудитораар ажиллаж байгаад түдгэлзсэн Д.Хүрэлбаатар ёсзүйн хариуцлага хүлээж, албан тушаалаас нь чөлөөлсөн. 

Нэр дэвшигч Д.Занданбат:

-Хуулийн хүрээнд ажиллаж, тодорхой гаргасан зөвлөмжийг ил болгодог. Хэрвээ томилогдвол Улсын үйлдвэрийн газарт хийсэн тохиолдолд хуулийн дагуу  танд мэдээлэл хүргүүлнэ.  Шударга, үнэн ажиллах сэтгэл байгаа. 

Ийнхүү гишүүд асуулт тавьж, хариулт авсны дараагаар Ерөнхий аудитор Д.Хүрэлбаатарыг чөлөөлөх санал хураалт явуулав. Байнгын хорооны хуралдаанд оролцсон гишүүдийн 83 хувийн саналаар Д.Хүрэлбаатарыг Ерөнхий аудитороор чөлөөлөхийг дэмжив. 

Дараагаар нь Ерөнхий аудитораар Д.Занданбатыг томилох санал хураахтай холбогдуулан гишүүд үг хэллээ. 

УИХ-ын гишүүн Ж.Мөнхбат:

-Би Ерөнхий аудитор Д.Хүрэлбаатарыг дэмжиж байна. "ЖДҮ" гэдэг юм гарч ирээд аваад явчихлаа. Би Д.Занданбат даргыг Ерөнхий аудитораар сайн ажиллаж чадах хүн гэж бодож байгаа. Төрд итгэх ард түмний итгэл алдарч байгаа. Энэ итгэлийг сэргээхэд анхаарч ажиллаарай. 

Ийнхүү Ерөнхий аудитораар Д.Занданбатыг томилохыг дэмжих санал хураалт явууллаа. Байнгын хорооны хуралдаанд оролцсон гишүүдийн 92.3 хувийн саналаар дэмжив.

Н.Энх