УИХ-ын чуулганы нэгдсэн хуралдаанаар 2018 оны эдийн засаг, нийгмийн хөгжүүлэх  үндсэн чиглэлийн хэрэгжилтийн тайланг чуулганы хуралдаанаар хэлэлцлээ. Хэлэлцэж байгаа асуудалтай холбогдуулан гишүүд асуулт тавьж, хариулт авсан юм. УИХ-ын гишүүн М.Билэгт:

-УИХ 2016 онд Монгол Улсад эдийн засгийн гүн хямрал болж, иргэд ажилгүй орлогогүй байх үед байгуулагдсан. Сонгуулийн үр дүнд байгуулагдсан УИХ Засгийн газар сонгогчдынхоо итгэлийг хөсөрдүүлээгүй байгаа. Яагаад гэвэл эдийн засаг хямарч, дампуурлаа зарлах үед ард түмэн сонголтоо хийж байсан. Харин одоо эдийн засаг өсөлттэй болж, бүх шатандаа үзүүлэлт нь сайн болсон байгаа. Энэ бол сонгогчдын сонголтын үр дүн юм. 

Төрийн үйлчилгээг иргэдэд орчин үеийн нөхцөлд хүргэх хөрөнгө оруулалтыг хийсээр ирлээ. Удахгүй жил хүрэхгүй хугацааны дараа би дүнгээ тавиулна. Мөрийн хөтөлбөрт бичигдсэн үг бүр дээр итгэж сонгогчид саналаа өгсөн. Бид цаг тутамд мөрийн хөтөлбөрийн хэрэгжилтээ бодож байх хэрэгтэй. Эдийн засаг өсч байгаа ч иргэдийн амьдралд анхаарах ёстой. Намын мөрийн хөтөлбөртөө ажилтай, орлоготой, бат бөх гэр бүл гэсэн заалт бий. Харин иргэдээ ажилтай, орлоготой болгох шаардлагын хэмжээнд хүрэхгүй байгаа. Амьдрал хүнд байгаагаас гэмт хэргийн зөрчил буурахгүй байгаа. 

ХХААХҮ-ийн сайд Ч.Улаан:

-Засгийн газар энэ жилийг Эх оронч худалдан авалтын жил болгон зарласан. Энэ хүрээнд эх орны худалдан авалтыг нэмэгдүүлэхийг дэмжих  чиглэлээр судалж байна. 

УИХ-ын гишүүн Б.Пүрэвдорж:

-Бүх айлууд бүгдээрээ зээлтэй байна. Тэтгэвэр нэмсэн боловч махны үнэ нэмэгдээд ялгагдах зүйлгүй болсон. Зээлийн хүүг бууруулах талаар ямар бодлого хийж байна вэ? Та нарын эдийн засгийн өсөлт Засгийн газарт л очиж байгаа. 

Сангийн сайд Ч.Хүрэлбаатар:

-Эдийн засгийн өсөлтөөс бий болсон мөнгөөр та бүгдийн өрийг төлсөн. Гадаадын банк, арилжааны банкнуудаас авсан бонд руу явсан. Эдийн засгийн өсөлтөөр ноолуурын үнэ өсч байгаа юм.  Та махны экспортыг дэмжих чиглэлээр сайн ярьдаг хүн. Үүний үр дүнд малчдын орлого бий байна. Төсвийн орлого давж биелээд, 196 тэрбум төгрөгийн ашигтай явж байгаа. 

Ийнхүү гишүүд асуулт тавьж, хариулт авлаа.