УИХ дахь МАН-ын бүлгийн хуралдаан өндөрлөлөө. Хуралдаанаар иргэдэд гурван хувий хүүтэй, 20 сая хүртэлх төгрөгийн итгэлцлийн зээл олгох хуулийн төслийг өргөн барих асуудлыг хэлэлцэн дэмжжээ. УИХ дахь МАН-ын бүлгийн дарга Д.Тогтохсүрэн мэдээлэл хийснийхээ дараа сэтгүүлчдийн асуултад хариулав. 

-МАН-ын дарга У.Хүрэлсүх УИХ-ын нөхөн сонгуульд нэр дэвших нь тодорхой боллоо гэж мэдээлэгдэж байна. Бүлэг дээр энэ асуудлыг хэлэлцсэн үү?

-УИХ-ын нөхөн сонгуулийн хуваарийн дагуу МАН сонгуульд оролцох хүсэлтээ илэрхийлж, СЕХ-ноос батламжаа авсан. УИХ-ын сонгуульд нэр дэвшүүлэх ажиллагаа хуулиараа таван сарын 24-28-ны хооронд явагдана. Тэр үед бага хурлаараа хэлэлцэн шийднэ. 

-ҮХЦ-д нөхөн сонгуультай холбоотой гомдол очсон байгаа. Нөхөн сонгууль хойшлогдох уу?

-Энэ талаар мэдээлэл байхгүй байна. ҮХЦ хүлээж авсан эсэхээс хамаарна. 

-Үндсэн хуулийн өөрчлөлтийг хэлэлцэж амжих уу?

-Бид хаврын чуулганаар Үндсэн хуулийн өөрчлөлтийг хэлэлцэнэ гэсэн байгаа. Ойрын хугацаанд хэлэлцэнэ. Ажлын хэсэг ажиллаж байгаа.  

-"Оюутолгой"-н ажлын хэсгийн дүгнэлтийг УИХ-аар хэлэлцээгүй байхад гадагш өгсөн Д.Дамба-Очир гишүүнд хариуцлага тооцох уу?

-Тэр мэдээлэл нууцын зэрэглэлгүй. Тийм учраас холбогдох материалыг өгч болно. 

Н.Энх