Дэд сайд асан Ж.Амарсанаа ЭМДС-аас мөнгө завшсан уу

Сүрьеэ өвчний халдвар, тархалтад анхаарал хандуулахгүй байгаа шалтгаанаар Эрүүл мэндийн сайд Д.Сарангэрэлийг огцрохыг шаардсан жагсаал зохион байгуулагдсан. Эрүүл мэндийн яамны гадаа хоёр өдөр жагссан жагсагчид мэргэжлийн бус сайдыг огцрох шаардлагыг тавьсан юм.
Эрүүл мэндийн сайд Д.Сарангэрэл өнөөдөр (2019.05.29) мэдэгдэл хийж, шаардлагын хариуг өглөө. Тэрбээр жагсаалыг зохион байгуулж буй Эрүүл мэндийн дэд сайд асан Ж.Амарсанаагийн мөнгө завшсан байж болзошгүй үйлдлийг дэлгэлээ. Ж.Амарсанаагийн Хаппи Веритас лаборатори нь элэгний вирусын шинжилгээ сөрөг гарсан 1882 хүн, эмчилгээнд огт ороогүй 4442 хүн нийт 6324 хүнд тусламж үйлчилгээ үзүүлсэн гэх хуурамч баримтаар ЭМДС-аас 758 сая төгрөг авсан байх магадлалтай байгаа аж. ЭМДС-аас энэ асуудлаар хууль хяналтын байгууллагад хандаж, гэмт үйлдэл байж болзошгүй гэх хариуг авч, үргэлжлүүлэн шалгахаар болсныг Эрүүл мэндийн сайд Д.Сарангэрэл хэллээ.
Мөн тэрбээр “...Ж.Амарсанаа таны сүрьеэ өвчний талаар ярьж буйг огтхон ч буруутгаагүй. Харин бага цалингаар энэ ажлыг хийж байгаа эмч нарын ажлыг үгүйсгэж байгааг эрс эсэргүүцэж байгаагаа хэлээд эрүүл мэндийн салбараар тоглож, өвчнөөр улс төр хийхээ зогсоохыг шаардлаа.
...Өнөөдрийн байдлаар тандалтад үндэслэн 90 сургуульд сүрьеэгийн үзлэг хийхээс 25-ыг хамруулж, 47 тохиолдол илрүүлж, эмчиллээ. Цаашид ч энэ ажил үргэлжилнэ. Эрт илрүүлэг, эмч мэргэжилтнүүдийн нөр их хөдөлмөрийн үр дүнд сүрьеэгийн тохиолдол жил ирэх тусам буурч байна. 2013 онд 4111, 2014 онд 4172, 2015 онд 4270, 2016 онд 4045, 2017 онд 3779, 2018 онд 3498 тохиолдол бүртгэгдсэн байна. Цаашид ч бууруулах зорилттой ажиллаж байгааг сайд мэдэгдэлдээ дурдлаа.
Б.Болд
СЭТГЭГДЭЛ БИЧИХ